सोलापूर : ईच्छा भगवंताची बहुउद्देशीय सामाजिक संस्थेच्या वतीने महाराष्ट्राचे मुख्यमंत्री देवेंद्र फडणवीस तसेच प्रभाग क्र. २२ चे भाजप नगरसेवक किसन जाधव यांच्या वाढदिवसानिमित्त आयोजित करण्यात आलेल्या ‘भाऊ चषक’ भव्य टेनिस बॉल क्रिकेट स्पर्धेला बुधवारी नेहरूनगर येथील शासकीय क्रीडांगणावर उत्साहात प्रारंभ झाला. स्पर्धेचे उद्घाटन महापौर विनायक कोंडयाल व सभागृह नेते नरेंद्र काळे यांच्या हस्ते झाले. यावेळी नगरसेवक किसन जाधव, नगरसेविका चैत्राली शिवराज गायकवाड, सामाजिक कार्यकर्ते शिवराज गायकवाड, चेतन गायकवाड, प्रेम गायकवाड आणि कार्तिक जाधव यांची प्रमुख उपस्थिती होती. उपस्थित मान्यवरांचे स्वागत व सत्कार किसन जाधव यांच्या हस्ते करण्यात आला.
यावेळी बोलताना महापौर विनायक कोंडयाल यांनी मुख्यमंत्री देवेंद्र फडणवीस आणि किसन जाधव यांना वाढदिवसाच्या शुभेच्छा देत अशा स्पर्धांमुळे युवकांना आपली गुणवत्ता सिद्ध करण्यासाठी सक्षम व्यासपीठ मिळते, असे सांगितले. ग्रामीण आणि शहरी भागातील गुणवंत क्रिकेटपटूंना प्रोत्साहन देण्यासाठी अशा उपक्रमांची गरज असल्याचेही त्यांनी नमूद केले. सभागृह नेते नरेंद्र काळे यांनीही स्पर्धेचे कौतुक करत युवकांनी क्रीडाक्षेत्रात मोठी भरारी घ्यावी, अशी अपेक्षा व्यक्त केली.
किसन जाधव म्हणाले, “‘भाऊ चषक’ स्पर्धेचा उद्देश केवळ सामने आयोजित करणे नसून, टेनिस बॉल क्रिकेटला अधिक मोठे व्यासपीठ मिळावे आणि ग्रामीण-शहरी भागातील खेळाडूंना आपली गुणवत्ता सिद्ध करण्याची संधी उपलब्ध व्हावी, हा आहे.” २२ ते २५ जुलैदरम्यान होणाऱ्या या स्पर्धेत १६ संघ आणि सुमारे २५० खेळाडू सहभागी होत आहेत. विजेत्या संघाला ₹४६ हजार व ट्रॉफी, उपविजेत्या संघाला ₹२३ हजार व ट्रॉफी, तर तृतीय क्रमांकाच्या संघाला ₹११ हजार व ट्रॉफी प्रदान करण्यात येणार आहे. याशिवाय मॅन ऑफ द मॅच, मॅन ऑफ द सिरीज आणि मालिकावीर असे वैयक्तिक पुरस्कारही देण्यात येणार आहेत.
स्पर्धेच्या यशस्वी आयोजनासाठी ईच्छा भगवंताची बहुउद्देशीय सामाजिक संस्थेचे पदाधिकारी व सदस्य परिश्रम घेत असून, चार दिवस चालणाऱ्या या स्पर्धेतील रंगतदार सामने क्रिकेटप्रेमींसाठी विशेष आकर्षण ठरणार आहेत.
