सोलापूर : जिल्हा परिषद माध्यमिक विभागातील शिक्षणाधिकाऱ्यांना धमकी देत सरकारी कामात अडथळा निर्माण केल्याप्रकरणी एका महिला सहशिक्षिकेविरोधात सदर बझार पोलीस ठाण्यात गुन्हा दाखल करण्यात आला आहे. या घटनेमुळे शिक्षण विभागात एकच खळबळ उडाली आहे.
याबाबत सचिन नागनाथ जगताप (वय ५२), शिक्षणाधिकारी, माध्यमिक विभाग, जिल्हा परिषद सोलापूर यांनी फिर्याद दिली आहे. त्यानुसार शीतल बबुशा काळे, सहशिक्षिका, न्यू इंग्लिश स्कूल, वेळापूर, ता. माळशिरस यांच्याविरोधात भारतीय न्याय संहिता कलम १३२ व ३५१(२) अन्वये गुन्हा दाखल करण्यात आला आहे.पोलिसांनी दिलेल्या माहितीनुसार, ११ मे २०२६ रोजी दुपारी जिल्हा परिषद माध्यमिक विभागाच्या कार्यालयात ही घटना घडली. संबंधित शिक्षिकेच्या वेतन बिलासंदर्भात चर्चा सुरू असताना आरोपी शिक्षिकेने संतप्त होत शिक्षणाधिकाऱ्यांना दमदाटी केल्याचा आरोप आहे. “तुम्ही माझे वेतन बिलाचे काम जाणीवपूर्वक करत नाही,” असे म्हणत त्यांनी अधिकाऱ्यांना बाहेर येण्याचे आव्हान दिले.
