सोलापूर : अखिल भारतीय काँग्रेस कमिटीचे अध्यक्ष खासदार मल्लिकार्जुन खरगे यांनी महाराष्ट्रातील काँग्रेस संघटनात्मक जिल्ह्यांच्या पुनर्रचनेला मंजुरी दिल्यानंतर सोलापूर काँग्रेसमध्येही महत्त्वपूर्ण फेरबदल करण्यात आले आहेत. पक्ष संघटना अधिक सक्षम आणि प्रभावी करण्याच्या उद्देशाने या नियुक्त्या जाहीर करण्यात आल्या.
अखिल भारतीय काँग्रेस कमिटीचे सरचिटणीस के. सी. वेणुगोपाल यांनी २० मे २०२६ रोजी नव्या नियुक्त्यांची घोषणा केली. त्यानुसार चेतनभाऊ नरोटे यांच्याकडे सोलापूर शहर काँग्रेस अध्यक्षपदाची जबाबदारी सोपविण्यात आली आहे. सातलिंग शटगार यांची सोलापूर पूर्व जिल्हा काँग्रेस अध्यक्षपदी, तर संदीप साठे यांची सोलापूर पश्चिम जिल्हा काँग्रेस अध्यक्षपदी नियुक्ती करण्यात आली आहे. या नियुक्त्या काँग्रेसच्या “संगठन सृजन अभियान” अंतर्गत करण्यात आल्या असून, पक्षाच्या विशेष निरीक्षकांनी स्थानिक पदाधिकारी व कार्यकर्त्यांशी संवाद साधून सादर केलेल्या अहवालानंतर वरिष्ठ पातळीवर चर्चा करून या निवडी निश्चित करण्यात आल्या.
नवनियुक्त पदाधिकाऱ्यांचे माजी केंद्रीय मंत्री सुशीलकुमार शिंदे, प्रदेशाध्यक्ष हर्षवर्धन सपकाळ, खासदार प्रणिती शिंदे यांच्यासह जिल्ह्यातील काँग्रेस नेत्यांनी अभिनंदन केले आहे. सोनिया गांधी, मल्लिकार्जुन खरगे, राहुल गांधी आणि हर्षवर्धन सपकाळ यांच्या नेतृत्वाखाली सोलापूर काँग्रेस अधिक बळकट होईल तसेच पक्षाचे पुरोगामी विचार तळागाळापर्यंत पोहोचविण्यास नवे नेतृत्व प्रभावीपणे काम करेल, असा विश्वास पक्षाकडून व्यक्त करण्यात आला आहे..
