अक्कलकोट व चिंचोली एमआयडीसीतील पायाभूत सुविधांसाठी उपाययोजनांना गती
सोलापूर :जिल्हा उद्योग मित्र समितीची बैठक जिल्हाधिकारी एस. कार्तिकेयन यांच्या अध्यक्षतेखाली बुधवारी पार पडली. या बैठकीत अक्कलकोट रोड एमआयडीसी आणि चिंचोली एमआयडीसीमधील पायाभूत सुविधांच्या प्रश्नांवर सविस्तर चर्चा करण्यात आली. बैठकीस इंडस्ट्रियल असोसिएशनचे पदाधिकारी, महापालिका अधिकारी तसेच संबंधित विभागांचे अधिकारी उपस्थित होते.
इंडस्ट्रियल असोसिएशनच्या वतीने औद्योगिक वसाहतींमध्ये पाणीपुरवठा, खराब रस्ते, ड्रेनेज लाईन आणि रस्त्यावरील दिवे या प्रमुख समस्यांकडे जिल्हाधिकाऱ्यांचे लक्ष वेधण्यात आले. तसेच शासकीय अभियांत्रिकी महाविद्यालयात टेक्स्टाईल शाखा सुरू करण्याची मागणीही करण्यात आली. पाणीटंचाईच्या प्रश्नावर महापालिका आयुक्तांसमवेत स्वतंत्र बैठक घेण्याची मागणी असोसिएशनने निवेदनाद्वारे केली. यावेळी जिल्हाधिकारी कार्तिकेयन यांनी संबंधित अधिकाऱ्यांना आवश्यक सुविधा उपलब्ध करून देण्यासाठी तातडीने कार्यवाही करण्याच्या सूचना दिल्या. एमआयडीसीमधील रस्त्यांच्या कामांसाठी शासनाकडून ७५ टक्के, महापालिकेकडून १२.५ टक्के आणि उर्वरित १२.५ टक्के निधी जिल्हा नियोजन व विकास समितीद्वारे उपलब्ध करून देण्याचा निर्णय यापूर्वीच्या बैठकीत घेण्यात आला होता. या निर्णयाची अंमलबजावणी लवकरात लवकर करण्याचे निर्देशही बैठकीत देण्यात आले.
