सोलापूर,; राज्यातील शाळांमध्ये राष्ट्रीय शिक्षण धोरण 2020 च्या अनुषंगाने त्रिभाषा धोरण निश्चित करण्याबाबत शिक्षणतज्ञ डॉ. नरेंद्र जाधव यांच्या अध्यक्षतेखाली समिती गठित करण्यात आलेली आहे. राष्ट्रीय शैक्षणिक धोरण 2020 च्या अनुषंगाने राज्यातील शाळांमध्ये त्रिभाषा सूत्र कोणत्या इयत्तेपासून आणि कशाप्रकारे लागू करावयाचे याबाबतचे धोरण निश्चित करण्याकरिता समिती राज्यातील विविध विभाग व जिल्हास्तरावर भेटी देत असून सोलापूर जिल्हा भेटीसाठी दि. 21 नोव्हेंबर 2025 रोजी येणार आहे.
या भेटी दरम्यान समिती सामान्य नागरिक, भाषातज्ञ, विचारवंत, मराठी भाषेशी संबंधित किंवा संलग्न शासकीय किंवा अशासकीय, खाजगी संस्था यांचे अध्यक्ष, सदस्य, राजकीय पक्षांचे नेते, लोकप्रतिनिधी, प्राथमिक व माध्यमिक शिक्षक संघटना यांचे अध्यक्ष सदस्य, पालक शिक्षक संघटनांचे पदाधिकारी, आंदोलनकर्ते यांच्या बरोबर संवाद साधणार असून त्रिभाषा धोरणा संदर्भात त्यांची मते व विचार जाणून घेणार आहेत. 21 नोव्हेंबर 2025 रोजी जिल्हा नियोजन भवन सभागृह (पहिला मजला) येथे चर्चासत्राचे आयोजन करण्यात आले असून त्याकरिता प्रश्नावली व मतावली देखील तयार करण्यात आलेली आहे. सदर चर्चासत्रासाठी जिल्ह्यातून सुमारे 300 जणांचा सहभाग अपेक्षित आहे.
या चर्चासत्राच्या अनुषंगाने गटशिक्षणाधिकारी तसेच महानगरपालिका व नगरपालिका शिक्षण मंडळांचे प्रशासनाधिकारी यांना त्यांच्या कार्यक्षेत्रातील अधिकाधिक तज्ञ व्यक्तींना जिल्हास्तरीय चर्चासत्रासाठी निमंत्रित करण्याच्या सूचनाही देण्यात आल्या आहेत. जिल्हयातील सर्व संबंधितांनी जिल्हा नियोजन भवन, सोलापूर येथील सभागृहात 21 नोव्हेंबर रोजी सकाळी ठीक 10 वाजता उपस्थित राहण्याचे आवाहन शिक्षणाधिकारी (प्राथमिक) कादर शेख यांनी केले आहे.
