सोलापूर, प्रतिनिधी : राज्य शासनाच्या स्वातंत्र्य सैनिक सन्मान निवृत्तीवेतन योजनेचा समावेश थेट लाभ हस्तांतरण (डीबीटी) प्रणालीमध्ये करण्यात येत असून, त्यासाठी लाभार्थ्यांची माहिती अद्ययावत करण्याची प्रक्रिया सुरू झाली आहे. त्यामुळे जिल्ह्यातील सर्व स्वातंत्र्यसैनिक निवृत्तीवेतनधारक तसेच स्वातंत्र्यसैनिकांच्या वारसपत्नींनी आवश्यक कागदपत्रे तातडीने सादर करावीत, असे आवाहन प्रशासनाने केले आहे.
डीबीटी पोर्टलवर लाभार्थ्यांची नोंदणी आणि माहिती अद्ययावत करण्यासाठी आधार कार्ड, पॅन कार्ड, बँक पासबुक तसेच पीपीओ आदेश (असल्यास) यांची स्व-साक्षांकित छायांकित प्रत संबंधित तहसील कार्यालय किंवा तलाठी कार्यालयाकडे जमा करणे आवश्यक आहे. प्रशासनाकडून तलाठी आणि कर्मचाऱ्यांच्या माध्यमातून गृहभेटीद्वारेही कागदपत्रांचे संकलन सुरू आहे. ज्या लाभार्थ्यांनी अद्याप आवश्यक माहिती आणि कागदपत्रे सादर केलेली नाहीत, त्यांनी संबंधित तहसील कार्यालय अथवा तलाठी कार्यालयाशी त्वरित संपर्क साधावा, असे प्रशासनाने स्पष्ट केले आहे. विहित मुदतीत माहिती उपलब्ध न झाल्यास लाभार्थ्यांची माहिती डीबीटी प्रणालीवर अद्ययावत होऊ शकणार नाही. परिणामी निवृत्तीवेतन जमा होण्यामध्ये अडचणी निर्माण होण्याची शक्यता आहे.
अधिक माहितीसाठी जिल्हाधिकारी कार्यालयातील स्वातंत्र्य सैनिक शाखेशी दूरध्वनी : ०२१७-२७३१०२० संपर्क साधण्याचे आवाहन निवासी उपजिल्हाधिकारी अभिजीत पाटील यांनी केले आहे.
- आवश्यक कागदपत्रे :
- आधार कार्ड
- पॅन कार्ड
- बँक पासबुक
- पीपीओ आदेशाची प्रत (असल्यास)
