सोलापूर | उत्तर सोलापूर तालुक्यातील अंबिका नगर येथील जिल्हा परिषद प्राथमिक शाळेत नवीन शैक्षणिक वर्षाच्या प्रारंभी आयोजित करण्यात आलेला प्रवेशोत्सव सोमवारी उत्साहपूर्ण वातावरणात पार पडला. या कार्यक्रमाला सोलापूरचे पोलीस आयुक्त एम. राजकुमार प्रमुख पाहुणे म्हणून उपस्थित होते.
प्रवेशोत्सवानिमित्त शाळेतील विद्यार्थ्यांचे औक्षण करून पुष्पवृष्टीत स्वागत करण्यात आले. यावेळी पहिलीच्या विद्यार्थ्यांना शालेय साहित्य, स्कूल बॅग, गणवेश, शूज आणि पाठ्यपुस्तकांचे वितरण करण्यात आले. तसेच शाळेतील सर्व विद्यार्थ्यांना गणवेश व पाठ्यपुस्तके देण्यात आली. पोलीस उपनिरीक्षक आनंद भवर यांच्या वतीने विद्यार्थ्यांना वह्यांचे वाटप करण्यात आले. कार्यक्रमापूर्वी सजविलेल्या जीपमधून विद्यार्थ्यांची मिरवणूक काढण्यात आली. यामुळे शाळा परिसरात उत्साहाचे आणि आनंदाचे वातावरण निर्माण झाले.
यावेळी बोलताना पोलीस आयुक्त एम. राजकुमार म्हणाले, “विद्यार्थ्यांनी जीवनात यशस्वी होण्यासाठी मनापासून अभ्यास करणे आवश्यक आहे. पुस्तकांना मित्र बनवा. सरकारी शाळेत शिक्षण घेऊन अनेकजण मोठ्या पदांवर कार्यरत आहेत. आजचा प्रवेशोत्सवाचा दिवस भविष्यात विद्यार्थ्यांसाठी प्रेरणादायी ठरेल.” या कार्यक्रमास नगरसेविका अलका आनंद भवर, चावडी पोलीस ठाण्याचे पोलीस निरीक्षक महादेव राऊत, पोलीस उपनिरीक्षक आनंद भवर, सतीश बावणे, शाळा व्यवस्थापन समितीच्या अध्यक्षा लक्ष्मी कनकधर, उपाध्यक्षा प्रज्ञा राऊत, जिल्हा परिषद प्राथमिक शिक्षणाधिकारी कादर शेख, शिक्षण विस्तार अधिकारी बापूराव जमादार यांच्यासह अनेक मान्यवर उपस्थित होते.
कार्यक्रमाचे प्रास्ताविक सिद्धाराम माशाळे यांनी केले, तर सूत्रसंचालन शिवशंकर राठोड यांनी केले. आभार प्रदर्शन रसिका बंदिछोडे यांनी केले. प्रवेशोत्सव यशस्वी करण्यासाठी मुख्याध्यापक दीपक काळे, वैशाली गोंदकर, विद्या वरडुळे आणि शिवाजी वडते यांनी विशेष परिश्रम घेतले.
