सोलापूर: पवित्र रमजान ईदचा सण सोलापूर शहरात अत्यंत शांततेत, उत्साहात आणि जातीय सलोख्याच्या वातावरणात साजरा व्हावा, यासाठी सोलापूर शहर पोलीस प्रशासन सज्ज झाले आहे. पोलीस आयुक्त यम. राजकुमार यांच्या मार्गदर्शनाखाली शहराच्या कानाकोपऱ्यात चोख पोलीस बंदोबस्त लावण्यात आला असून, यासंदर्भातील ‘बंदोबस्त गोषवारा’ आज जाहीर करण्यात आला आहे.
शहरातील ईदगाह मैदान, मशिदी आणि संवेदनशील भागांत कोणताही अनुचित प्रकार घडू नये, यासाठी पोलीस आयुक्तांनी व्यापक नियोजन केले आहे. या बंदोबस्तामध्ये वरिष्ठ अधिकाऱ्यांपासून ते गृहरक्षक दलाच्या जवानांपर्यंत सर्वांचा समावेश करण्यात आला आहे. ३ पोलीस उपआयुक्त आणि ७ सहाय्यक पोलीस आयुक्त स्वतः रस्त्यावर उतरून संपूर्ण बंदोबस्ताचे नियंत्रण करणार आहेत. शहरातील मुख्य ईदगाह मैदान आणि विविध मशिदींमध्ये होणाऱ्या विशेष नमाज पठणासाठी जास्तीत जास्त पोलीस बंदोबस्त तैनात करण्यात आला आहे. गर्दीच्या ठिकाणांवर सीसीटीव्ही कॅमेऱ्यांच्या माध्यमातून ‘वॉच’ ठेवला जाणार आहे. तसेच गरजेनुसार ड्रोन कॅमेऱ्यांचा वापरही केला जाईल. ईदच्या दिवशी वाहतुकीची कोंडी टाळण्यासाठी वाहतूक शाखेच्या वतीने विशेष मार्ग बदल (Traffic Diversions) करण्यात आले आहेत.महिलांची छेडछाड किंवा चोरीच्या घटना रोखण्यासाठी साध्या वेशातील पोलीस पथके आणि ‘दामिनी पथक’ सक्रिय राहणार आहेत.
सोशल मीडियावर अफवा पसरवणाऱ्यांवर सायबर शाखेची बारीक नजर असेल. कोणत्याही प्रक्षोभक मेसेजवर विश्वास न ठेवण्याचे आवाहन करण्यात आले आहे. असे आव्हान पोलीस आयुक्त एम राजकुमार यांनी सोलापूरकरांना केले आहे
रमजान ईद हा आनंदाचा सण आहे. सर्व नागरिकांनी अफवांकडे दुर्लक्ष करावे आणि शहरात शांतता राखण्यासाठी पोलीस प्रशासनाला सहकार्य करावे. कायदा व सुव्यवस्था बिघडवणाऱ्यांवर कडक कारवाई केली जाईल.“पोलीस आयुक्त : एम राजकुमार
