सोलापूर : मुख्यमंत्री देवेंद्र फडणवीस यांच्या ५६ व्या वाढदिवसानिमित्त स्व. विष्णुपंत तात्यासाहेब कोठे प्रतिष्ठानतर्फे ५६ हजार वह्यांच्या वाटप अभियानाचा सोमवारी शुभारंभ करण्यात आला. वसंतराव नाईक हायस्कूल आणि समता मराठी विद्यालय येथे झालेल्या कार्यक्रमात विद्यार्थ्यांना वह्यांचे वितरण करून सामाजिक बांधिलकीचा संदेश देण्यात आला.
यावेळी आमदार देवेंद्र कोठे, भाजप शहराध्यक्षा रोहिणी तडवळकर, महिला व बालकल्याण समितीच्या सभापती निर्मला जंगम, नगरसेवक रवी कैय्यावाले, भारतसिंग बडूरवाले, श्वेता खांडेकर यांच्यासह विविध मान्यवर उपस्थित होते. भाजप शहराध्यक्षा रोहिणी तडवळकर यांनी, वाढदिवस साजरा करण्यासाठी अनावश्यक खर्च करण्याऐवजी विद्यार्थ्यांच्या शिक्षणासाठी ५६ हजार वह्यांचे वाटप हा अनुकरणीय उपक्रम असल्याचे सांगितले. आमदार देवेंद्र कोठे हे समाजाभिमुख लोकप्रतिनिधी असून सोलापूरच्या विकासासाठी सातत्याने प्रयत्नशील असल्याचे त्यांनी नमूद केले.
आमदार देवेंद्र कोठे यांनी, नेत्यांच्या वाढदिवसानिमित्त समाजोपयोगी उपक्रम राबविण्याची परंपरा वाढली पाहिजे, असे सांगत विद्यार्थ्यांनी शिक्षण घेऊन सक्षम नागरिक बनावे आणि भविष्यात गरजू विद्यार्थ्यांच्या शिक्षणासाठी मदतीचा हात पुढे करावा, असे आवाहन केले. उपक्रमाच्या यशस्वी आयोजनासाठी प्रतिष्ठानचे अभिषेक चिंता, अंबादास सकीनाल, त्रिमूर्ती बल्ला, पवन खांडेकर, ओंकार राजगे, अभिषेक बोल्ली, नागेश म्हेत्रे, सागर बल्ला, उदयराज गुलापल्ली, अमर शिंदे, लकी दिवेकर व सहकाऱ्यांनी विशेष परिश्रम घेतले.
