अक्कलकोट; अक्कलकोटच्या श्री वटवृक्ष निवासी श्री स्वामी समर्थांची कीर्ती आणि त्यांच्या कार्याचा महिमा जगभर पोहोचविण्यासाठी विशेषांकाच्या माध्यमातून होत असलेले कार्य कौतुकास्पद असून, या विशेषांकामुळे स्वामी भक्तांना समृद्ध व अभ्यासपूर्ण साहित्य उपलब्ध होईल, असा विश्वास श्री वटवृक्ष स्वामी महाराज देवस्थानचे चेअरमन तथा भाजप नगरसेवक महेश इंगळे यांनी व्यक्त केला. मिरज येथील स्वामीभक्त अनिल दबडे यांनी संपादित केलेल्या ‘श्री स्वामी समर्थ’ विशेषांकाचे प्रकाशन श्री वटवृक्ष मंदिरातील स्वामींच्या गाभाऱ्यासमोर महेश इंगळे यांच्या हस्ते करण्यात आले. यावेळी दैनिक संचारचे मुख्य वरिष्ठ उपसंपादक प्रशांत जोशी, कवी मारुती कटकधोड तसेच विशेषांकाचे संपादक अनिल दबडे उपस्थित होते.

विशेषांकाच्या प्रकाशनानंतर बोलताना महेश इंगळे यांनी अंकाच्या दर्जेदार मांडणीचे आणि त्यातील लेखांचे विशेष कौतुक केले. अंकातील प्रत्येक लेख वाचनीय असून, श्री स्वामी समर्थांच्या कार्याचा आणि विचारांचा प्रसार करण्यासाठी हा विशेषांक निश्चितच महत्त्वपूर्ण ठरेल, असे त्यांनी सांगितले. स्वामींच्या भक्तीपरंपरेशी संबंधित विविध विषयांचा समावेश या अंकात करण्यात आल्याने भाविकांसाठी तो संग्राह्य ठरेल, असेही त्यांनी नमूद केले. यावेळी महेश इंगळे यांच्या हस्ते विशेषांकाचे संपादक अनिल दबडे यांचा श्री स्वामी समर्थांचे कृपावस्त्र, प्रसाद व प्रतिमा देऊन यथोचित सत्कार करण्यात आला. प्रकाशन सोहळ्यामुळे मंदिर परिसरात भक्तिमय वातावरण निर्माण झाले होते. स्वामी भक्तांसह मंदिर समितीचे पदाधिकारी आणि विश्वस्त मोठ्या संख्येने उपस्थित होते.

यावेळी स्वामीभक्त सखुबाई दबडे, संगीता दबडे, ऋषभ देव, ज्ञानेश्वर आवटी, मंदिर समितीचे प्रथमेश इंगळे, सचिव आत्माराम घाटगे, विश्वस्त महेश गोगी, श्रीशैल गवंडी, प्रसाद सोनार, विपूल जाधव, श्रीकांत मलवे, स्वामीनाथ लोणारी, सागर गोंडाळ, व्यंकटेश पुजारी यांच्यासह भाविक भक्त उपस्थित होते.