सोलापूर: शहरातील नवीन मिळकतींचा शोध घेण्यास टाळाटाळ करणे आणि मालमत्तांची ई-केवायसी (e-KYC) पूर्ण न करणे, ही कामे कर संकलन विभागातील ५१ कर्मचाऱ्यांना चांगलीच महागात पडली आहेत. महानगरपालिका आयुक्त डॉ. सचिन ओंबासे यांनी दिलेल्या आदेशांचे उल्लंघन केल्याप्रकरणी, या ५१ कर्मचाऱ्यांवर प्रत्येकी एक हजार रुपये, असा एकूण ५१ हजार रुपयांचा दंड ठोठावण्यात आला आहे.महापालिकेच्या वतीने मालमत्ता कर संकलन विभागात नवीन मिळकतींचा शोध घेण्याचे काम हाती घेण्यात आले होते.
या कामात हलगर्जीपणा करणाऱ्या कर्मचाऱ्यांवर कठोर कारवाई करण्याचे संकेत आयुक्त डॉ. ओंबासे यांनी यापूर्वीच दिले होते. मात्र, अनेक कर्मचाऱ्यांनी या महत्त्वाच्या कामाकडे दुर्लक्ष केल्याचे समोर आले आहे.ही कारवाई दोन टप्प्यांत करण्यात आली आहे. मिळकतींचा शोध न घेतल्याबद्दलव ३६ कर्मचाऱ्यांना प्रत्येकी एक हजार रुपयांप्रमाणे ३६ हजार रुपयांचा दंड व ई-केवायसी पूर्ण न केल्याबद्दल तसेच १५ कर्मचाऱ्यांना प्रत्येकी एक हजार रुपयांप्रमाणे १५ हजार रुपयांचा दंड.हा दंड संबंधित कर्मचाऱ्यांच्या जून आणि जुलै महिन्याच्या वेतनातून कापला जाणार असल्याची माहिती प्रशासनाकडून देण्यात आली आहे. मनपा प्रशासनाच्या या धडक कारवाईमुळे महापालिका वर्तुळात खळबळ उडाली आहे.
