माढा : तालुक्यातील कुंडूबावी येथे कौटुंबिक वादातून विवाहित महिला व तिच्या वृद्ध सासू-सासऱ्यावर जीवघेणा हल्ला झाल्याची धक्कादायक घटना उघडकीस आली आहे. संबंधित आरोपींनी घरात घुसून मारहाण करत संसारोपयोगी साहित्य जबरदस्तीने घेऊन गेल्याची तक्रार करण्यात आली असून आरोपींवर कठोर कारवाई करण्याची मागणी करण्यात आली आहे.याबाबत संगीता सिंधू काळे (वय ३५, रा. भांबरे वस्ती, कुंडूबावी) यांनी सोलापूर ग्रामीण पोलीस अधीक्षकांकडे लेखी तक्रार दाखल केली आहे.
तक्रारीनुसार, त्या पती, सासू व सासरे यांच्यासह वास्तव्यास असून शेती व शेळीपालन करून उदरनिर्वाह करतात.बुधवारी सायंकाळच्या सुमारास काही आरोपी त्यांच्या घरात घुसले. जुन्या वादाच्या कारणावरून शिवीगाळ करत आरोपींनी संगीता काळे यांना मारहाण केली. त्याचवेळी त्यांच्या सासू सोनाबाई सोपान काळे यांनाही लाकडी दांडक्याने मारहाण करण्यात आल्याचा आरोप तक्रारीत करण्यात आला आहे.यावेळी आरोपींनी घरातील संसारोपयोगी साहित्य, भांडीकुंडी तसेच अन्य वस्तू जबरदस्तीने घेऊन जात परिसरात दहशतीचे वातावरण निर्माण केल्याचेही तक्रारीत नमूद करण्यात आले आहे. घटनेनंतर जखमींवर शासकीय रुग्णालयात उपचार करण्यात आले असून कुंडूबावी पोलीस ठाणे येथे फिर्याद दाखल करण्यात आली आहे.
दरम्यान, तक्रारीतील मुख्य आरोपी अक्षय रविंद्र भोसले याच्यावर यापूर्वीही कारवाई झाल्याचे सांगण्यात आले असून तो सध्या मोकाट फिरत असल्याचा आरोप अर्जदार महिलेने केला आहे. संबंधित आरोपींवर तातडीने कठोर कारवाई करून आदिवासी पारधी समाजाला न्याय द्यावा, अशी मागणी निवेदनाद्वारे करण्यात आली आहे.
