सोलापूर: सोलापूर विभाग शिक्षक मतदारसंघाचे उमेदवार मंगेश चिवटे यांनी आज सोलापूरचे शिक्षणाधिकारी (प्राथमिक/माध्यमिक) सचिन जगताप यांची भेट घेतली. या बैठकीत जिल्ह्यातील शिक्षकांचे प्रलंबित प्रश्न, सेवाविषयक अडचणी आणि शैक्षणिक गुणवत्ता वाढवण्यासाठी तातडीने करावयाच्या उपाययोजनांवर सविस्तर चर्चा करण्यात आली.निवडणुकीच्या पार्श्वभूमीवर शिक्षकांशी ही संवाद साधत असताना समोर आलेले गंभीर प्रश्न मार्गी लावण्यासाठी मंगेश चिवटे यांनी सांगीतले आहे.
अनेक शिक्षकांचे शालार्थ आयडी प्रलंबित असल्याने त्यांच्या वेतनात अडचणी येत आहेत. हे आयडी तातडीने मंजूर करण्याची मागणी करण्यात आली. सेवानिवृत्त शिक्षकांचे पेन्शन प्रस्ताव आणि सातव्या वेतन आयोगाची थकबाकी वेळेत मिळावी, यासाठी पाठपुरावा करण्यात आला. अंशतः अनुदानित शाळांवरील शिक्षकांना पूर्ण पगार आणि वरिष्ठ श्रेणीचे लाभ मिळवून देण्याबाबत चर्चा झाली. शिक्षकांच्या प्रशासकीय बदल्यांमधील पारदर्शकता आणि रिक्त पदांवर पात्र शिक्षकांची पदोन्नती या विषयावर चिवटे यांनी प्रशासनाचे लक्ष वेधले
मंगेश चिवटे यांचे प्रतिपादन: “शिक्षक हा समाजाचा कणा आहे, परंतु दुर्दैवाने आजही त्यांना त्यांच्या हक्काच्या मानधनासाठी आणि लाभांसाठी सरकारी कार्यालयांचे उंबरठे झिजवावे लागत आहेत. शिक्षणाधिकारी सचिन जगताप यांच्याशी झालेली चर्चा सकारात्मक असून, प्रशासनाने हे प्रश्न युद्धपातळीवर सोडवावेत, अशी आमची भूमिका आहे.
