आमदार सुभाष देशमुख यांची सांस्कृतिक मंत्र्यांकडे मागणी
सोलापूर: सोलापूरचे ग्रामदैवत शिवयोगी श्री सिध्देश्वर महाराजांच्या ९०० वर्षांची परंपरा असलेल्या ऐतिहासिक ‘गड्डा यात्रे’चा समावेश २०२७ च्या प्रजासत्ताक दिनी नवी दिल्लीतील ‘कर्तव्य पथा’वरील चित्ररथांमध्ये करावा, अशी लेखी मागणी सोलापूर दक्षिणचे आमदार सुभाष देशमुख यांनी राज्य सरकारकडे केली आहे.
या संदर्भात आमदार देशमुख यांनी राज्याचे माहिती व तंत्रज्ञान आणि सांस्कृतिक कार्य मंत्री आशिष शेलार यांना पत्र पाठवले आहे.१२ व्या शतकातील युगपुरुष श्री सिध्देश्वर महाराजांनी सोलापुरात ६८ शिवलिंगांची स्थापना केली. त्यांच्या या कार्याचा आणि श्रद्धेचा वारसा गेली नऊ शतके अविरत सुरू आहे.
दरवर्षी जानेवारी महिन्यात भरणारी ही ‘गड्डा यात्रा’ केवळ धार्मिक उत्सव नसून ती ग्रामीण संस्कृती आणि एकतेचे प्रतीक आहे. यामध्ये नंदीध्वज मिरवणूक, होम विधी आणि अक्षता सोहळा हे मुख्य आकर्षण असतात. या यात्रेला महाराष्ट्र, कर्नाटक आणि आंध्र प्रदेशातून लाखो भाविक येतात. या भव्य परंपरेचे दर्शन संपूर्ण देशाला व्हावे, या उद्देशाने दिल्लीतील संचलनात महाराष्ट्राच्या वतीने ‘सिध्देश्वर यात्रा’ या विषयावर आधारित चित्ररथ साकारण्यात यावा, अशी विनंती करण्यात आली आहे.
