सोलापूर ; तीन दिवसांपूर्वी घडलेले सोलापूर महानगरपालिकेतील भंगार चोरी प्रकरण अद्यापही गाजत आहे. या प्रकरणात पोलिसांनी टेम्पो चालक जमीर हैदर इनामदार याला अटक केली होती. पण या प्रकरणी अॅड. निलेश जोशी यांनी अतिरिक्त सत्र न्यायालयात अतिक्रमण विभाग प्रमुख जगन्नाथ बनसोडे यांच्यावतीने अंतरीम अटकपूर्व जामीन अर्ज दाखल केला होता. बनसोडे यांना अटक करण्याची आवश्यकता नसल्याने बी.एन.एस.एस. चे कलम ३५/३ प्रमाणे सदर बझार पोलिसांनी नोटीस दिल्याची बाब न्यायालयाच्या निदर्शनास आणून दिली. बनसोडे यांचा जामिनाचा अर्ज वकिलांनी माघारी घेतला. त्यामुळे बनसोडे यांनी कामकाजाच्या वेळेत विभागात पूर्ववत कामावर रूजू झाले. या गुन्ह्यचा तपास करणारे सहाय्यक पोलीस निरीक्षक पाटील यांनी भंगार चोरी प्रकरणात, एकाच कलमांखाली गुन्हा दाखल झाल्यानंतर टेम्पो चालक जमीर इनामदार याला अटक केली होती. तर त्या कलमांखाली बनसोडे यांना अटक करण्याची आवश्यता नाही अशी नोटीस दिली आहे.
दि. १८ मे २०२६ रोजी ४ वाजण्याच्या सुमारास महानगरपालिकेच्या आवारातील स्टोअर मधून, जमीर हैदर इनामदार व तीन अज्ञात इसम यांनी, तसेच महानगरपालिकेचे अधिकारी बनसोडे, सचिन गाडे, दीपक कुंभार व देखरेख करणारे यांनी संगनमत करून, महानगरपालिकेच्या कोणत्याही विभागाची परवानगी न घेता आवारात असलेल्या स्टोअर मधून अतिक्रमण मोहिमेमध्ये जप्त करून आणलेले लोखंडी साहित्य चोरी करून घेवून जाताना मिळून आले. यावेळी १ लाख ३० हजाराचे जुने लोखंडी भंगार, व मिळून आलेले क्रिम रंगाचा एमएच १३/सीयू १५८३ या क्रमांकाचा छोटा हत्ती टेम्पो मिळून आला होता.
