सोलापूर ; विधानपरिषद स्थानिक स्वराज्य संस्था मतदारसंघाच्या द्विवार्षिक निवडणुकीच्या पार्श्वभूमीवर सोलापूर जिल्ह्यातील संबंधित भागांमध्ये ‘ड्राय डे’ जाहीर करण्यात आला आहे. निवडणूक प्रक्रिया शांततापूर्ण, मुक्त व निर्भय वातावरणात पार पडावी तसेच कायदा व सुव्यवस्था अबाधित राहावी, यासाठी जिल्हाधिकारी तथा जिल्हा दंडाधिकारी एस. कार्तिकेयन यांनी हा आदेश जारी केला आहे. भारत निवडणूक आयोगाने जाहीर केलेल्या कार्यक्रमानुसार, १८ जून २०२६ रोजी मतदान तर २२ जून २०२६ रोजी मतमोजणी होणार आहे.
आदेशानुसार, सोलापूर महानगरपालिका हद्द, कुर्डूवाडी, पंढरपूर, मंगळवेढा आणि अकलूज नगरपरिषद हद्दीतील सर्व मद्यविक्री दुकाने, बार, क्लब आणि संबंधित अनुज्ञप्तीधारक आस्थापना १६ जून रोजी दुपारी ४ वाजल्यापासून बंद राहतील. १७ जून रोजी संपूर्ण दिवस तसेच १८ जून रोजी मतदान संपेपर्यंत, दुपारी ४ वाजेपर्यंत मद्यविक्रीवर बंदी राहणार आहे. याशिवाय, सोलापूर महानगरपालिका हद्दीतील संबंधित आस्थापना २२ जून रोजी मतमोजणी प्रक्रिया पूर्ण होईपर्यंत बंद ठेवण्यात येणार आहेत.
या आदेशाचे उल्लंघन करणाऱ्या अनुज्ञप्तीधारकांवर कायदेशीर कारवाई करण्यात येणार असून, महाराष्ट्र दारुबंदी कायदा, १९४९ मधील कलम ५४ व ५६ नुसार अनुज्ञप्ती कायमस्वरूपी रद्द करण्याची कारवाईही केली जाऊ शकते, असा इशारा जिल्हाधिकारी एस. कार्तिकेयन यांनी दिला आहे.
