सोलापूर : जिल्ह्यातील कायदा व सुव्यवस्था अबाधित राखण्यासाठी आणि नागरिकांच्या आरोग्याला धोका निर्माण करणाऱ्या अवैध हातभट्टी व्यवसायावर अंकुश आणण्यासाठी सोलापूर ग्रामीण पोलिसांनी धडाकेबाज कारवाई केली आहे. दक्षिण सोलापूर तालुक्यातील मुळेगाव तांडा येथे छापा टाकून तब्बल ७ लाख ४७ हजार ५०० रुपयांचा मुद्देमाल जप्त करून नष्ट करण्यात आला.पोलीस अधीक्षक अतुल कुलकर्णी यांच्या आदेशानुसार आणि वरिष्ठ पोलीस निरीक्षक संजय जगताप यांच्या नेतृत्वाखाली स्थानिक गुन्हे शाखा व सोलापूर तालुका पोलिसांच्या संयुक्त पथकाने ही कारवाई केली.
छाप्यादरम्यान अवैध हातभट्टी निर्मितीसाठी वापरण्यात येणारे गुळमिश्रित रसायन, लोखंडी बॅरल, प्लास्टिक ड्रम, चुली तसेच इतर साहित्य मोठ्या प्रमाणात आढळून आले.कारवाईची विशेष बाब म्हणजे अवैध हातभट्टी निर्मितीचे अड्डे कायमस्वरूपी उद्ध्वस्त करण्यासाठी जेसीबी मशीनच्या सहाय्याने संपूर्ण साहित्य आणि संरचना नष्ट करण्यात आली. तसेच परिसरातील इतर संशयित ठिकाणांचा शोध घेण्यासाठी आणि संपूर्ण कारवाईवर देखरेख ठेवण्यासाठी ड्रोन तंत्रज्ञानाचा वापर करण्यात आला.या प्रकरणी अवैध हातभट्टी निर्मितीसाठी साहित्य बाळगल्याप्रकरणी चार सराईत हातभट्टी व्यवसायिकांविरोधात सोलापूर तालुका पोलीस ठाण्यात महाराष्ट्र दारूबंदी अधिनियमांतर्गत गुन्हे दाखल करण्यात आले आहेत.अवैध दारू निर्मिती व विक्री करणाऱ्यांविरोधात यापुढेही अशाच प्रकारची कठोर कारवाई सुरू राहणार असल्याचा इशारा पोलिसांनी दिला आहे.
