सोलापूर : ज्येष्ठ पत्रकार कै. अविनाश व्यंकटेश कुलकर्णी यांच्या स्मृतिप्रीत्यर्थ दिला जाणारा प्रतिष्ठेचा ‘कै. अविनाश कुलकर्णी स्मृती आदर्श पत्रकार पुरस्कार’ यंदा दैनिक लोकमतचे मुख्य उपसंपादक रविंद्र देशमुख यांना जाहीर करण्यात आला आहे. या पुरस्काराचे वितरण सोमवार, १३ जुलै रोजी सकाळी ११ वाजता सोलापूर श्रमिक पत्रकार संघाच्या सभागृहात आयोजित करण्यात आले आहे. महापौर विनायक कोंड्याल यांच्या हस्ते देशमुख यांना रोख रक्कम, सन्मानचिन्ह, शाल व पुष्पगुच्छ देऊन गौरविण्यात येणार आहे.
कै. अविनाश कुलकर्णी यांनी अनेक वर्षे निस्वार्थ भावनेने पत्रकारिता करत समाजहिताच्या प्रश्नांना वाचा फोडली. पत्रकारितेतील मूल्ये जपत त्यांनी अनेक तरुण पत्रकारांना मार्गदर्शन केले. त्यांच्या स्मृती जतन करण्याबरोबरच गुणवंत पत्रकारांचा सन्मान करण्याच्या उद्देशाने या पुरस्काराची स्थापना करण्यात आली असून, यंदा या पुरस्काराचे दुसरे वर्ष आहे. रविंद्र देशमुख हे गेल्या तीन दशकांपासून पत्रकारिता क्षेत्रात कार्यरत असून, राजकीय, सामाजिक, सांस्कृतिक आणि साहित्यिक विषयांवरील त्यांच्या अभ्यासपूर्ण लेखनाची विशेष दखल घेतली जाते. पत्रकारितेतील त्यांच्या उल्लेखनीय योगदानाची नोंद घेऊन यंदाच्या पुरस्कारासाठी त्यांची निवड करण्यात आली आहे.
पुरस्कार वितरण सोहळ्यास पत्रकार, साहित्यप्रेमी आणि नागरिकांनी उपस्थित राहावे, असे आवाहन सोलापूर श्रमिक पत्रकार संघाचे अध्यक्ष विक्रम खेलबुडे, सरचिटणीस सागर सुरवसे आणि खजिनदार किरण बनसोडे यांनी केले आहे.
