हॉटेल ग्रामपंचायत’च्या किचनमध्ये विवाहित रील्सस्टारची गळफास घेऊन आत्महत्या; कारण अद्याप अस्पष्ट
सोलापूर : सोशल मीडियावर आपल्या रील्समधून लाखो चाहत्यांचे मनोरंजन करणाऱ्या लोकप्रिय रील्सस्टार महिलेने प्रत्यक्ष आयुष्यात आत्महत्येसारखे टोकाचे पाऊल उचलल्याने मंगळवेढा तालुक्यात खळबळ उडाली आहे. ब्रह्मपुरी येथील “हॉटेल ग्रामपंचायत”च्या स्वयंपाकघरात गळफास घेत रोहिणी निलेश पाराध्ये (वय २५) यांनी आत्महत्या केली मंगळवारी दुपारी अडीचच्या सुमारास ही घटना उघडकीस आली. रोहिणी पाराध्ये या पती निलेश पाराध्ये यांच्यासह रत्नागिरी-नागपूर राष्ट्रीय महामार्गालगत “हॉटेल ग्रामपंचायत” हे हॉटेल चालवत होत्या. याच हॉटेलच्या किचनमध्ये त्यांनी दोरीच्या सहाय्याने गळफास घेतल्याचे समोर आले. घटनेनंतर उपस्थितांनी त्यांना तातडीने मंगळवेढा ग्रामीण रुग्णालयात दाखल केले. मात्र, उपचारापूर्वीच वैद्यकीय अधिकाऱ्यांनी त्यांना मृत घोषित केले. या प्रकरणी मंगळवेढा पोलिस ठाण्यात आकस्मात मृत्यूची नोंद करण्यात आली असून पोलिस पुढील तपास करीत आहेत.
आत्महत्येचे कारण अद्याप गुलदस्त्यात
रोहिणी यांनी सोशल मीडियावर रील्सच्या माध्यमातून अल्पावधीत मोठी लोकप्रियता मिळवली होती. त्यांच्या विनोदी, सामाजिक आणि खाद्यसंस्कृतीवरील व्हिडीओंना हजारो-लाखोंचा प्रतिसाद मिळत होता. कौटुंबिक आयुष्य आणि व्यवसायही सुरळीत सुरू असल्याचे सांगितले जात असताना त्यांनी हे टोकाचे पाऊल का उचलले, याबाबत विविध तर्कवितर्क लढवले जात आहेत. मात्र, आत्महत्येमागचे नेमके कारण अद्याप समोर आलेले नाही.
चाहत्यांना मोठा धक्का
रोहिणी आणि निलेश पाराध्ये या जोडप्याने सोशल मीडियावर स्वतःची वेगळी ओळख निर्माण केली होती. “हॉटेल ग्रामपंचायत” आणि त्यांच्या रील्समुळे ते विशेष चर्चेत होते. अचानक घडलेल्या या घटनेमुळे चाहत्यांसह परिसरात हळहळ व्यक्त केली जात आहे.
