सोलापूर : दुष्काळी परिस्थितीमुळे आर्थिक संकटाचा सामना करणाऱ्या शेतकरी कुटुंबांतील विद्यार्थ्यांना राज्य शासनाने मोठा दिलासा दिला आहे. फेब्रुवारी-मार्च २०२७ मध्ये होणाऱ्या दहावी आणि बारावीच्या परीक्षांसाठी दुष्काळग्रस्त भागातील पात्र विद्यार्थ्यांना परीक्षा शुल्कमाफीचा लाभ देण्यात येणार आहे. शासनाच्या निर्णयानुसार माध्यमिक व उच्च माध्यमिक शिक्षण विभागाकडून याबाबत कार्यवाही सुरू करण्यात आली असून, जिल्ह्यातील संबंधित शाळा आणि कनिष्ठ महाविद्यालयांना आवश्यक सूचना देण्यात आल्या आहेत.
महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्या फेब्रुवारी-मार्च २०२७ मध्ये होणाऱ्या दहावी आणि बारावीच्या परीक्षांसाठी विद्यार्थ्यांकडून परीक्षा शुल्क आकारले जाते. मात्र, दुष्काळग्रस्त भागातील विद्यार्थ्यांच्या कुटुंबांची आर्थिक परिस्थिती लक्षात घेऊन शासनाने परीक्षा शुल्कमाफीचा निर्णय घेतला आहे. त्यामुळे पात्र विद्यार्थ्यांवरील परीक्षेच्या खर्चाचा भार कमी होणार आहे.
विशेषतः ग्रामीण भागात शेतीवर अवलंबून असलेल्या कुटुंबांना दुष्काळामुळे आर्थिक अडचणींचा सामना करावा लागतो. अशा परिस्थितीत मुलांच्या शिक्षणाचा खर्च भागविणे पालकांसाठी आव्हानात्मक ठरते. दहावी आणि बारावी या विद्यार्थ्यांच्या शैक्षणिक आयुष्यातील महत्त्वाच्या परीक्षा असल्याने आर्थिक अडचणींमुळे कोणताही पात्र विद्यार्थी या सवलतीपासून वंचित राहू नये, यासाठी शिक्षण विभागाकडून खबरदारी घेण्यात येत आहे.
शासन निर्णयानुसार सोलापूर जिल्ह्यातील दुष्काळग्रस्त भागातील पात्र विद्यार्थ्यांना परीक्षा शुल्कमाफीचा लाभ मिळण्यासाठी संबंधित शाळा आणि कनिष्ठ महाविद्यालयांनी आवश्यक कार्यवाही करणे अपेक्षित आहे. विद्यार्थ्यांची माहिती, पात्रता आणि आवश्यक कागदपत्रांची पडताळणी करून पुढील प्रक्रिया राबविण्यात येणार आहे.
दरम्यान, परीक्षा शुल्कमाफीच्या लाभासाठी विद्यार्थ्यांकडून आवश्यक अर्ज भरून घेण्याच्या सूचना शिक्षण विभागाने दिल्या आहेत. शाळांनी विद्यार्थ्यांना या योजनेची माहिती देऊन अर्जप्रक्रियेत सहकार्य करावे, असेही स्पष्ट करण्यात आले आहे. त्यामुळे शुल्कमाफीसाठी पात्र असलेल्या विद्यार्थ्यांनी संबंधित शाळा किंवा कनिष्ठ महाविद्यालयाशी संपर्क साधणे आवश्यक आहे. दुष्काळग्रस्त भागातील विद्यार्थ्यांना शिक्षणाच्या मुख्य प्रवाहात कायम ठेवण्यासाठी आणि आर्थिक कारणांमुळे त्यांच्या शैक्षणिक वाटचालीत अडथळा निर्माण होऊ नये, यासाठी हा निर्णय महत्त्वाचा ठरणार आहे.
“दुष्काळग्रस्त भागातील दहावी व बारावीच्या पात्र विद्यार्थ्यांना शासन निर्णयानुसार परीक्षा शुल्कमाफीचा लाभ मिळणार आहे. यासाठी संबंधित शाळा व कनिष्ठ महाविद्यालयांनी विद्यार्थ्यांचे अर्ज वेळेत भरून घ्यावेत. आवश्यक कागदपत्रांची पूर्तता करून एकही पात्र विद्यार्थी या सवलतीपासून वंचित राहणार नाही, याची दक्षता घ्यावी.”
