सोलापूर ; श्री शिवजन्मोत्सव मध्यवर्ती महामंडळाच्या वतीने छत्रपती शिवाजी महाराजांच्या राज्याभिषेक दिनानिमित्त शहरातील छत्रपती शिवाजी महाराज चौक येथे भव्य आणि उत्साहपूर्ण राज्याभिषेक सोहळा संपन्न झाला. शिवभक्तांच्या मोठ्या उपस्थितीत झालेल्या या सोहळ्यामुळे संपूर्ण परिसर शिवमय झाला होता.
कार्यक्रमास जिल्ह्याचे पालकमंत्री जयकुमार गोरे, जिल्हा परिषदेचे अध्यक्ष दीपक वैद्य, उपाध्यक्ष इंद्रजीत पवार, महापौर विनायक कोंड्याल, उपमहापौर ज्ञानेश्वर देवकर, सभागृह नेते नरेंद्र काळे, भाजप शहराध्यक्षा रोहिणी तळवळकर, स्थायी समिती अध्यक्षा रंजना चाकोते, कृषी उत्पन्न बाजार समितीचे संचालक मनीष देशमुख यांच्यासह विविध मान्यवर उपस्थित होते. राज्याभिषेक दिनानिमित्त छत्रपती शिवाजी महाराजांच्या अश्वारूढ पुतळ्याची आकर्षक फुलांनी सजावट करण्यात आली होती. सकाळी विधिवत पूजन, जिजाऊ वंदना आणि दुग्धाभिषेकाचा कार्यक्रम पार पडला. यावेळी मध्यवर्ती महामंडळाच्या उत्सव मूर्तीचेही पूजन करण्यात आले.
