पोलिस आयुक्त एम. राज कुमार यांची ५६ वी मोठी कारवाई; येरवडा कारागृहात रवानगी
सोलापूर; सोलापूर शहरातील विविध पोलीस ठाण्यांच्या हद्दीत गंभीर स्वरूपाचे गुन्हे करणारा सराईत गुंड प्रदीप मौला गायकवाड (वय ३३, रा. सेटलमेंट फ्री कॉलनी नं. ६, सलगर वस्ती, सोलापूर) याच्यावर सोलापूर शहर पोलिसांनी एमपीडीए कायद्यान्वये कठोर कारवाई करत त्यास स्थानबद्ध केले आहे. त्याची येरवडा कारागृह, पुणे येथे रवानगी करण्यात आली आहे.
- प्रदीप गायकवाड हा सदर बझार, सलगर वस्ती, विजापूर नाका आणि फौजदार चावडी पोलीस ठाण्यांच्या हद्दीत साथीदारांच्या मदतीने अवैध आर्थिक फायद्यासाठी गंभीर गुन्हे करत असल्याची माहिती पोलिस तपासात समोर आली आहे. सेटलमेंट फ्री कॉलनी नं. ६, भैरू वस्ती, थोबडे मळा, लिमयेवाडी, लक्ष्मी नगर, साईबाबा चौक, स्टेशन रोड, डोणगाव रोड, बाळे, वांगी रोड, विजापूर रोड, कावळे गल्ली, सोरेगाव आणि जुना विजापूर नाका परिसरात त्याने दहशत निर्माण केली होती. त्याच्याविरुद्ध सोलापूर शहरात एकूण १२ गंभीर गुन्हे दाखल असून, त्याच्या गुन्हेगारी कृत्यांमुळे नागरिकांचे दैनंदिन जीवन विस्कळीत झाले होते. व्यापारी आणि सामान्य नागरिकांमध्ये त्याची भीती निर्माण झाल्याने अनेकजण उघडपणे पोलिसांना माहिती देण्यास धजावत नसल्याचेही पोलिसांनी नमूद केले आहे.
- प्रदीप गायकवाड यास गुन्हेगारी कृत्यांपासून परावृत्त करण्यासाठी यापूर्वी विविध प्रतिबंधात्मक कारवाया करण्यात आल्या होत्या. सन २०१२ मध्ये फौजदारी प्रक्रिया संहितेच्या कलम ११० अन्वये, तसेच २०१४ आणि २०२४ मध्ये कलम १०७ अन्वये कारवाई करण्यात आली होती. याशिवाय २०१६ व २०२४ मध्ये महाराष्ट्र पोलीस अधिनियमाच्या कलम ५६(१)(अ)(ब) अंतर्गतही कारवाई झाली होती. मात्र, त्याच्या वर्तनात कोणताही बदल न झाल्याने अखेर एमपीडीए कायद्यान्वये स्थानबद्धतेचा निर्णय घेण्यात आला. पोलीस आयुक्त एम. राज कुमार यांनी २१ मे २०२६ रोजी एमपीडीए अधिनियम १९८१ च्या कलम ३ अंतर्गत स्थानबद्धतेचे आदेश निर्गमित केले. त्यानुसार प्रदीप गायकवाड यास ताब्यात घेऊन येरवडा कारागृहात दाखल करण्यात आले.
- ही कारवाई पोलीस आयुक्त एम. राज कुमार यांच्या मार्गदर्शनाखाली पोलीस उपआयुक्त डॉ. अश्विनी पाटील, विजय कबाडे, प्रितम यावलकर, सहाय्यक पोलीस आयुक्त राजन माने, दिलीप पवार, वरिष्ठ पोलीस निरीक्षक अरविंद माने, वपोनि नामदेव बंडगर तसेच एमपीडीए पथकातील अधिकाऱ्यांनी केली. दरम्यान, शहरातील सार्वजनिक सुव्यवस्था अबाधित ठेवण्यासाठी अवैध व्यवसाय करणारे, सराईत गुंड आणि समाजविघातक प्रवृत्तीच्या व्यक्तींवर यापुढेही एमपीडीए अंतर्गत कठोर कारवाई सुरू राहणार असल्याचे पोलिस प्रशासनाने स्पष्ट केले आहे.
