सोलापूर : सोलापूर जिल्हा मध्यवर्ती सहकारी बँक ही शेतकरी आणि सर्वसामान्यांची बँक असून, बँकेच्या माध्यमातून आर्थिक बळ मिळाले तरच शेतकरी सक्षम होईल. त्यामुळे जिल्हा मध्यवर्ती सहकारी बँक नेहमी नफ्यात राहून शेतकऱ्यांच्या पाठीशी ठामपणे उभी राहिली पाहिजे, असे प्रतिपादन पालकमंत्री जयकुमार गोरे यांनी केले. सोलापूर जिल्हा मध्यवर्ती सहकारी बँक सेवक पतसंस्थेच्या ९१ व्या सर्वसाधारण सभेत ते बोलत होते. यावेळी पालकमंत्री गोरे यांच्या हस्ते आमदार राजेंद्र राऊत यांचा विशेष सत्कार करण्यात आला. समाजसेवेसाठी धडाडीने कार्य करणारे आणि सामान्यांच्या प्रश्नांसाठी सातत्याने लढणारे नेतृत्व म्हणून आमदार राऊत यांचे त्यांनी कौतुक केले.
पालकमंत्री गोरे म्हणाले, “मी रविवारी सहसा कोणत्याही कार्यक्रमाला जात नाही. मात्र, कर्मचाऱ्यांनी आमदार राजेंद्र राऊत यांच्या सत्काराचे आयोजन केल्यामुळे मी आवर्जून उपस्थित राहिलो. मी कोणाला संपवण्यासाठी नव्हे, तर सोलापूरच्या सर्वांगीण विकासासाठी आलो आहे.” ते पुढे म्हणाले की, जिल्ह्यातील बंद पडलेला दूध संघ पुन्हा सुरू करण्यासाठी शासनस्तरावर प्रयत्न केले जातील. तसेच डीसीसी बँकेतील कर्मचारी आणि कर्मचाऱ्यांच्या पतसंस्थेच्या विविध प्रश्नांबाबतही सकारात्मक पाठपुरावा करण्यात येईल. आगामी जिल्हा मध्यवर्ती बँकेची निवडणूक माजी आमदार राजन पाटील यांच्या नेतृत्वाखाली यशस्वीपणे पार पडेल आणि त्यामध्ये भाजपला यश मिळेल, असा विश्वासही त्यांनी व्यक्त केला.
यावेळी जिल्हा परिषद अध्यक्ष दीपक वैद्य, महापौर विनायक कोंड्याल, आमदार सचिन कल्याणशेट्टी, आमदार देवेंद्र कोठे, माजी आमदार राजन पाटील, दीपक साळुंखे, राम सातपुते, भाजप शहराध्यक्षा रोहिणी तडवळकर, दिलीप कोल्हे तसेच डीसीसी बँक पतसंस्थेचे कर्मचारी मोठ्या संख्येने उपस्थित होते. कार्यक्रमाच्या प्रारंभी पतसंस्थेचे चेअरमन राजेंद्र पवार यांनी प्रास्ताविक केले, तर श्रीरंग सातपुते यांनी आभार मानले
