सोलापूर : महापालिका अंदाजपत्रकावर विभागनिहाय चर्चेच्या दुसऱ्या दिवशी मंडई विभागाच्या महसूलवाढीसंदर्भात नगरसेवक सत्यजित वाघमोडे यांनी महत्त्वपूर्ण सूचना मांडत शहरातील सर्व भाजी विक्रेत्यांची अधिकृत नोंदणी करून त्यांना क्यूआर कोड आधारित ओळखपत्र देण्याची मागणी केली. सोलापूर महानगरपालिकेच्या 2026-27 च्या अंदाजपत्रकावर विभागनिहाय चर्चेच्या दुसऱ्या दिवशी मंडई विभागाच्या महसूलवाढीसंदर्भात सभागृहात सविस्तर चर्चा करण्यात आली. शहरातील भाजी विक्रेत्यांची वाढती संख्या लक्षात घेता महसूल वाढीसाठी ठोस उपाययोजना करण्याची गरज व्यक्त केली.यावेळी नगरसेवक सत्यजित वाघमोडे यांनी महत्त्वपूर्ण सूचना मांडत शहरातील सर्व भाजी विक्रेत्यांची अधिकृत नोंदणी करून त्यांना क्यूआर कोड आधारित ओळखपत्र देण्याची मागणी केली.
सध्या मोठ्या प्रमाणात भाजी विक्रेते रस्त्यावर व्यवसाय करत असले तरी त्यांची अधिकृत नोंद नसल्याने महापालिकेला अपेक्षित महसूल मिळत नसल्याचे त्यांनी स्पष्ट केले.या क्यूआर कोड प्रणालीमुळे प्रत्येक विक्रेत्याची माहिती डिजिटल स्वरूपात उपलब्ध राहणार असून, परवाना तपासणी सुलभ होईल. तसेच अधिकृत व अनधिकृत विक्रेत्यांमध्ये स्पष्ट फरक करता येईल, ज्यामुळे अतिक्रमणावर नियंत्रण ठेवण्यास मदत होईल.तसेच शहरातील ठराविक ठिकाणी भाजी विक्रीसाठी स्वतंत्र झोन निश्चित करण्याचीही मागणी करण्यात आली. यामुळे वाहतूक कोंडी कमी होऊन शहरातील शिस्त व स्वच्छता राखण्यास मदत होईल.
सभागृहातील चर्चेदरम्यान या प्रस्तावाला सकारात्मक प्रतिसाद मिळाल्याचे दिसून आले. प्रशासनाने याबाबत ठोस निर्णय घेण्याची अपेक्षा नगरसेवक वाघमोडे यांनी व्यक्त केली.
