सोलापूर : विधान परिषद स्थानिक स्वराज्य संस्था मतदारसंघाच्या निवडणुकीसाठी गुरुवारी सकाळी ७ वाजल्यापासून मतदान प्रक्रिया सुरू होणार असून प्रशासनाने सर्व तयारी पूर्ण केली आहे. मतदान शांततेत आणि पारदर्शक वातावरणात पार पडावे यासाठी जिल्हाभरातील मतदान केंद्रांवर कडक पोलीस बंदोबस्त तैनात करण्यात आला आहे.जिल्ह्यातील विविध तालुक्यांमध्ये उभारण्यात आलेल्या मतदान केंद्रांवर मतदारांना आवश्यक सुविधा उपलब्ध करून देण्यात आल्या आहेत.
काही संवेदनशील केंद्रांवर अतिरिक्त पोलीस दलाची नियुक्ती करण्यात आली असून निवडणूक प्रक्रियेवर विशेष लक्ष ठेवण्यात येणार आहे.या निवडणुकीत केवळ दोन उमेदवार रिंगणात असल्याने मतदारांमध्ये उत्सुकता निर्माण झाली आहे. पसंतीक्रम पद्धतीनुसार मतदान होणार असले तरी मतदारांना इच्छेनुसार एकाच उमेदवाराला मत देण्याचाही पर्याय उपलब्ध राहणार आहे.मतदानानंतर २२ जून रोजी मतमोजणी होणार असून निकालाकडे राजकीय वर्तुळाचे लक्ष लागले आहे.
स्थानिक स्वराज्य संस्थांमधील लोकप्रतिनिधींच्या मतांवर या निवडणुकीचे भवितव्य ठरणार असल्याने जिल्ह्यातील राजकीय घडामोडींना वेग आला आहे.निवडणूक प्रक्रियेदरम्यान कोणताही अनुचित प्रकार घडू नये यासाठी निवडणूक विभाग, महसूल प्रशासन आणि पोलीस यंत्रणा सतर्क असून मतदान केंद्रांवर काटेकोर देखरेख ठेवण्यात येणार आहे. विधान परिषदेच्या या निवडणुकीत मतदारांचा कौल कोणाच्या पारड्यात पडणार याची उत्सुकता आता शिगेला पोहोचली आहे.
