सोलापूर : जिल्हा परिषदेचे नूतन मुख्य कार्यकारी अधिकारी म्हणून कुशल जैन यांनी गुरुवारी पदभार स्वीकारला. पदभार स्वीकारल्यानंतर त्यांनी आपल्या आगामी कामाच्या नियोजनाबाबत माहिती दिली. सोलापूर जिल्ह्याचा विस्तार आणि येथील भौगोलिक परिस्थिती पाहता, सद्यस्थितीत ‘पाणी टंचाई निवारण’ हे आपल्यासाठी सर्वोच्च प्राधान्य असेल, असे त्यांनी यावेळी स्पष्ट केले.
पाणी प्रश्नावर विशेष लक्षजैन म्हणाले की, सध्या उन्हाळ्याची तीव्रता वाढत आहे. जिल्ह्यातील अनेक तालुके हे अवर्षणप्रवण (Drought-prone) आहेत. त्यामुळे ग्रामीण भागात पिण्याच्या पाण्याची कमतरता भासू नये, यासाठी पाणी टंचाईचा सविस्तर आढावा घेण्यात येईल. तसेच, ‘जलजीवन मिशन’ अंतर्गत जिल्ह्यात नळाद्वारे पाणीपुरवठ्याची जी कामे सुरू आहेत, ती योग्य रीतीने पूर्ण झाली आहेत का आणि त्यातून ग्रामस्थांना नियमित पाणी मिळत आहे का, याची काटेकोर तपासणी करण्यावर भर दिला जाईल.
जिल्ह्याच्या पावन भूमीत सेवेची संधी सोलापूरच्या अध्यात्मिक आणि ऐतिहासिक महत्त्वाचा उल्लेख करताना ते म्हणाले की, “पंढरपूरचे विठ्ठल-रुक्मिणी, सिद्धेश्वर महाराज आणि अक्कलकोटचे स्वामी समर्थ अशा पावन भूमीत काम करण्याची संधी मिळणे ही माझ्यासाठी अभिमानाची गोष्ट आहे. पुढील दोन-तीन वर्षे जनसेवेसाठी पूर्ण क्षमतेने प्रयत्न करेन.
“असा आहे प्रशासकीय प्रवास : कुशल जैन हे २०२२ च्या बॅचचे आयएएस (IAS) अधिकारी आहेत. ते मूळचे जबलपूर (मध्य प्रदेश) येथील आहेत. यापूर्वी त्यांनी:दिल्ली येथे रस्ते वाहतूक आणि महामार्ग मंत्रालयात ‘सहाय्यक सचिव’ म्हणून काम केले आहे.नागपूर जिल्ह्यात एक वर्ष प्रोबेशनरी कालावधी पूर्ण केला.गडचिरोली जिल्ह्यातील अहेरी येथे उपविभागीय अधिकारी (SDO) आणि एकात्मिक आदिवासी विकास प्रकल्पाचे प्रकल्प अधिकारी म्हणून दीड वर्ष सेवा बजावली आहे.जिल्ह्यातील रखडलेले प्रकल्प मार्गी लावणे आणि सर्वसामान्य नागरिकांच्या तक्रारींचे निवारण करण्यावर आपला विशेष कल राहील, असेही त्यांनी यावेळी नमूद केले.
