पंढरपूर, ता. ५ : शेतीच्या प्रकरणात ११ हजारांची लाच घेतल्याप्रकरणी पटवर्धन कुरोली (ता. पंढरपूर) येथील तत्कालीन मंडल अधिकाऱ्याला पाच वर्षे सक्तमजुरी आणि १५ हजार रुपये दंड अशी शिक्षा सुनावली आहे. येथील जिल्हा न्यायाधीश ओ. आर. देशमुख यांनी ही शिक्षा सुनावली. जगन्नाथ मारुती कुंभार असे शिक्षा झालेल्या मंडल अधिकाऱ्याचे नाव आहे. तक्रारदाराच्या मुलाच्या नावावर असलेल्या जमिनीत ये-जा करण्यासाठी व मालाची वाहतूक करण्यासाठी गट नं. ५५६ मधील ६ गुंठे शेतजमीन खरेदी-विक्री करण्याचा अहवाल लवकर पंढरपूर तहसीलदारांकडे पाठवून देण्यासाठी मंडल अधिकाऱ्याने ११ हजार रुपये लाचेची मागणी करून स्वीकारली होती.
याप्रकरणी ३१ मार्च २०१५ रोजी पंढरपूर शहर पोलिस ठाण्यात मंडल अधिकारी जगन्नाथ कुंभार यांच्या विरोधात गुन्हा दाखल करण्यात आला होता. त्यानंतर लाचलुचपत प्रतिबंधक विभागाने २०१६ मध्ये येथील जिल्हा व सत्र न्यायालयात विशेष खटला दाखल केला. या खटल्यामध्ये चार साक्षीदारांची साक्ष घेण्यात आली. ७ एप्रिल रोजी युक्तिवाद पूर्ण झाल्यानंतर ५ मे २०२६ रोजी येथील न्यायाधीश ओ. आर. देशमुख यांनी जगन्नाथ कुंभार यांनी लाच स्वीकारल्याचे सिद्ध झाल्याने पाच वर्षे सक्तमजुरीची शिक्षा सुनावली आहे.
