येरमाळा (प्रतिनिधी): कुलस्वामिनी श्री येडेश्वरी देवीच्या चैत्र यात्रा महोत्सवाचे बिगुल वाजले असून, यंदा हा महोत्सव २ एप्रिल ते ७ एप्रिल २०२६ या कालावधीत मोठ्या उत्साहात साजरा होणार आहे. धाराशिव जिल्ह्यातील कळंब तालुक्यातील येरमाळा येथे भरणारा हा महोत्सव भाविकांसाठी श्रद्धेचा आणि आनंदाचा सोहळा असतो. या ६ दिवसांच्या महोत्सवात विविध धार्मिक आणि सांस्कृतिक कार्यक्रमांची रेलचेल असणार आहे.
ग्रामपंचायत कार्यालय येरमाळा, श्री येडेश्वरी देवस्थान ट्रस्ट आणि समस्त ग्रामस्थ येरमाळा यांच्या वतीने या महोत्सवाचे आयोजन करण्यात आले आहे. या सोहळ्याचा लाभ घेण्याचे आवाहन आयोजकांनी केले आहे.
- गुरुवार, २ एप्रिल (प्रारंभ): चैत्र पौर्णिमेनिमित्त देवीचा छबिना आणि रात्री ९:०० वाजता ‘महाआरती’ पूजेने महोत्सवाची सुरुवात होईल.
- शुक्रवार, ३ एप्रिल: येडेश्वरी मंदिराकडून आमराई मंदिराकडे पालखी प्रस्थान (सकाळी ८:१५) आणि सकाळी ११:०० वाजता ‘चुनाळच्या रानात’ पालखीचे आगमन होईल.
- शनिवार, ४ एप्रिल: सकाळी ११:०० वाजता भव्य ‘पशु प्रदर्शन’ आयोजित करण्यात आले आहे.
- रविवार, ५ एप्रिल: दुपारी १:०० वाजता कुस्तीचा जंगी फड आणि रात्री ९:०० वाजता आराध्यांच्या गाण्यांचा कार्यक्रम होईल.
- सोमवार, ६ एप्रिल: रात्री ९:०० वाजता भव्य ‘शोभेची दारू काम’ (आतषबाजी) करण्यात येईल.
- मंगळवार, ७ एप्रिल (सांगता): दुपारी १:०० वाजता घुगरी महाप्रसाद वाटप होईल. त्यानंतर आमराई मंदिरातून पालखीचे मुख्य मंदिराकडे प्रस्थान होऊन महोत्सवाची सांगता होईल.
