सोलापूर विद्यापीठ परिसरात घोषणाबाजी; मागण्या न मानल्यास तीव्र आंदोलनाचा इशारा
सोलापूर :पुण्यश्लोक अहिल्यादेवी होळकर सोलापूर विद्यापीठातील शिक्षकेतर कर्मचाऱ्यांनी प्रलंबित मागण्यांसाठी सोमवारी विद्यापीठाच्या मुख्य इमारतीसमोर जोरदार निदर्शने करत घोषणाबाजी केली. विद्यापीठीय व महाविद्यालयीन सेवक संयुक्त कृती समितीच्या हाकेवर हे आंदोलन करण्यात आले.
दुपारच्या भोजन अवकाशात झालेल्या या आंदोलनात कर्मचाऱ्यांनी सेवांतर्गत आश्वासित प्रगती योजना लागू करणे, उर्वरित कर्मचाऱ्यांना सातवा वेतन आयोग लागू करणे, जुनी पेन्शन योजना पुन्हा सुरू करणे तसेच सातव्या वेतन आयोगानुसार रजा रोखीकरणाचा लाभ देण्याच्या मागण्या केल्या. मागण्यांवर शासनाने तातडीने सकारात्मक निर्णय न घेतल्यास टप्प्याटप्प्याने तीव्र आंदोलन छेडण्यात येईल, असा इशाराही कर्मचाऱ्यांनी दिला.
दरम्यान, या आंदोलनाला सोलापूर जिल्हा शिक्षक संघाने (सुटा) जाहीर पाठिंबा दिला. ‘सुटा’चे जिल्हाध्यक्ष प्रा. नेताजी कोकाटे आणि सचिव प्रा. गुरमे यांनी कर्मचारी संघटनेचे अध्यक्ष सुनील थोरात यांना पाठिंब्याचे पत्र सुपूर्द केले. या आंदोलनात महासंघ उपाध्यक्ष सोमनाथ सोनकांबळे, रवी हुक्किरे, भागवत घंटे, प्रशांत चोरमले, वसंत सप्ताळे, कांचन आघाव, उज्ज्वला दंतकाळे यांच्यासह मोठ्या संख्येने कर्मचारी व पदाधिकारी सहभागी झाले होते.
