महिला-बालकल्याण समितीच्या ४.२३ कोटींच्या योजनांना मंजुरी..!

एआय प्रशिक्षण, पोलीस भरतीपूर्व मार्गदर्शनासह महिला सक्षमीकरणावर भर

सोलापूर : सोलापूर महानगरपालिका महिला व बालकल्याण समितीच्या पहिल्याच बैठकीत सन २०२६-२७ या आर्थिक वर्षासाठी ४ कोटी २३ लाख ७८ हजार १८ रुपयांच्या योजना व उपक्रमनिहाय विवरणपत्रकाला मंजुरी देण्यात आली. महिलांचे सक्षमीकरण, कौशल्य विकास, एआय प्रशिक्षण तसेच पोलीस भरतीपूर्व मार्गदर्शन यांसारख्या उपक्रमांवर यंदा विशेष भर देण्यात आला आहे महापालिकेच्या क्रांतीज्योती सावित्रीबाई फुले सभागृहात शुक्रवारी समितीच्या सभापती निर्मला जंगम यांच्या अध्यक्षतेखाली झालेल्या बैठकीत हा निर्णय घेण्यात आला. मागील आर्थिक वर्षातील १ कोटी १३ लाख ७८ हजार १८ रुपयांचा अखर्चित निधी चालू आर्थिक वर्षात खर्च करण्यास मान्यता देण्यात आली. चालू वर्षासाठी मंजूर ३ कोटी १० लाख रुपयांच्या तरतुदीसह एकूण ४.२३ कोटी रुपयांच्या निधीतून विविध योजना राबविण्यात येणार आहेत.

या विवरणपत्रकाला स्थायी समितीची मंजुरी मिळाली असून अंतिम मान्यतेसाठी ते सर्वसाधारण सभेकडे पाठविण्यात येणार आहे. महिलांना आधुनिक कौशल्यांचे प्रशिक्षण देण्याच्या उद्देशाने महिला व मुलींसाठी पोलीस भरतीपूर्व प्रशिक्षण, आर्टिफिशियल इंटेलिजन्स (एआय) आधारित कौशल्य विकास अभ्यासक्रम, स्वयंरोजगारासाठी व्यावसायिक व तांत्रिक प्रशिक्षण तसेच रोजगार मेळाव्यांचे आयोजन करण्यात येणार आहे. याशिवाय महिला, मुली आणि बालकांच्या सर्वांगीण विकासासाठी विविध कल्याणकारी योजना राबविण्यात येणार असून महापालिका शाळांमधील सुविधा वाढविणे, गुणवत्तापूर्ण शिक्षणाला प्रोत्साहन देणे आणि विद्यार्थ्यांसाठी आवश्यक सुविधा उपलब्ध करून देण्यावरही भर दिला जाणार आहे.

“महिला, मुली आणि बालकांच्या सर्वांगीण विकासासाठी यंदा १९ योजना व उपक्रमांसाठी ३ कोटी ८५ लाख ६० हजार ५२० रुपयांची तरतूद करण्यात आली आहे. महापालिका शाळांचा दर्जा उंचावण्यासाठी आणि गुणवत्तापूर्ण शिक्षणाला प्राधान्य देण्यासाठी विविध उपक्रम राबविण्यात येणार आहेत.”
— निर्मला जंगम, सभापती, महिला व बालकल्याण समिती