सोलापूर : राज्याचे उद्योगमंत्री उदय सामंत यांनी सोलापूर दौऱ्यादरम्यान अक्कलकोट रोडवरील होटगी येथील ब्रहन्मठास भेट देऊन पीठाधीश्वर डॉ. मल्लिकार्जुन शिवाचार्य महाराज यांचे दर्शन घेत आशीर्वाद घेतले. यावेळी आमदार विजय देशमुख त्यांच्यासोबत उपस्थित होते. या प्रसंगी खासदार धैर्यशील माने, माजी आमदार सिद्धाराम म्हेत्रे, नगरसेवक शिवानंद पाटील, शिवसेना नेते अमोल शिंदे, अमर पाटील, केदार उंबरजे, मंगेश चिवटे यांच्यासह विविध मान्यवर उपस्थित होते. मान्यवरांचे ब्रहन्मठात स्वागत करण्यात आले.
भेटीदरम्यान पीठाधीश्वर डॉ. मल्लिकार्जुन शिवाचार्य महाराज यांनी मठामार्फत राबविण्यात येणारे विविध धार्मिक, सामाजिक व शैक्षणिक उपक्रमांची माहिती दिली. तसेच अक्कलकोट रोड परिसरातील स्मशानभूमीच्या जागेबाबत शासनाने सकारात्मक भूमिका घेऊन आवश्यक सहकार्य करावे, अशी अपेक्षा व्यक्त केली.
यावर उद्योगमंत्री उदय सामंत यांनी विषयाची गांभीर्याने दखल घेत संबंधित बाबींचा पाठपुरावा करून आवश्यक ती कार्यवाही करण्यासाठी प्रयत्न करण्यात येतील, अशी ग्वाही दिली. समाजोपयोगी आणि लोकहिताच्या उपक्रमांना शासनाचे सहकार्य राहील, असेही त्यांनी यावेळी सांगितले. सौहार्दपूर्ण वातावरणात झालेल्या या भेटीत परिसरातील विकासकामे, सामाजिक उपक्रम आणि जनहिताच्या विविध विषयांवरही चर्चा झाली. उद्योगमंत्र्यांच्या भेटीमुळे मठ परिसरात उत्साहाचे वातावरण निर्माण झाले होते.
