महसूल विभाग पुन्हा हादरला! ३३ हजारांच्या लाचप्रकरणी दोन अधिकारी अटकेत..

सोलापूर : लाचलुचपत प्रतिबंधक विभागाने (एसीबी) माढा तालुक्यातील लाचखोरीच्या प्रकरणात मोठी कारवाई करत तलाठी सुदर्शन जयवंत याच्यासह मंडळ अधिकारी बालाजी गोरख नागटिळक यांना अटक केली आहे. या कारवाईमुळे महसूल विभागात एकच खळबळ उडाली आहे.या प्रकरणात तक्रारदाराकडून काम करून देण्यासाठी ३३ हजार रुपयांची लाच मागण्यात आली होती.

एसीबीने सापळा रचून २० मार्च २०२६ रोजी तलाठी सुदर्शन जयवंत याला लाच स्वीकारताना रंगेहाथ पकडले होते. त्यानंतर तपास अधिक खोलवर करण्यात आला.तपासादरम्यान तक्रारदार, साक्षीदार आणि आर्थिक व्यवहारांची पडताळणी करण्यात आली. त्यामध्ये मंडळ अधिकारी बालाजी गोरख नागटिळक यांचा लाच प्रकरणात सहभाग असल्याचे निष्पन्न झाल्यानंतर त्यांनाही आरोपी करण्यात आले. अखेर २३ जुलै २०२६ रोजी त्यांना अटक करण्यात आली.या प्रकरणी माढा पोलिस ठाण्यात भ्रष्टाचार प्रतिबंधक अधिनियम, १९८८ अंतर्गत गुन्हा दाखल असून पुढील तपास एसीबीकडून सुरू आहे.एसीबीचे आवाहन : कोणत्याही शासकीय अधिकारी किंवा त्यांच्या वतीने कोणीही कामासाठी लाचेची मागणी करत असल्यास नागरिकांनी तत्काळ लाचलुचपत प्रतिबंधक विभागाशी संपर्क साधावा, असे आवाहन पोलिस उपअधीक्षक प्रशांत चोगुले यांनी केले आहे.