सोलापूर : पुणे, सातारा आणि सोलापूर जिल्ह्यातून मार्गक्रमण केलेल्या आषाढी वारी पालखी सोहळ्यात वारकऱ्यांच्या स्वागत आणि सोयी-सुविधांसाठी सोलापूर जिल्हा परिषदेने तब्बल २ कोटी १० हजार रुपयांचा खर्च केला आहे. वारीच्या मार्गावर भाविक भक्तांचे स्वागत करणारे शुभेच्छा फलक, श्लोक बॅनर आणि भव्य होर्डिंग उभारण्याच्या या कामाची ई-निविदा प्रक्रिया पूर्ण करून प्रत्यक्ष अंमलबजावणी करण्यात आली जिल्हा परिषदेचे मुख्य कार्यकारी अधिकारी कुशल जैन यांच्या मंजुरीने जारी करण्यातआलेल्या कार्यारंभ आदेशानुसार अहिल्यानगर जिल्ह्यातील फॉर्च्यून क्राऊन आऊटडोअर अॅडव्हर्टायझिंग, शनिशिंगणापूर या संस्थेमार्फत हे काम पूर्ण करून घेण्यात आली. या संपूर्ण उपक्रमाअंतर्गत ३ प्रमुख बाबींवर हा निधी खर्च करण्यात आला आहे.
हा खर्च ७ जुलै ते २४ जुलै या वारीच्या कालावधीत संत ज्ञानेश्वर महाराज आणि संत तुकाराम महाराज यांच्या पालखी मार्गावर करण्यात आलेल्या कामासाठी झाला आहे. विविध संतांच्या पालख्यांच्या आगमनापूर्वी किमान तीन दिवस आधी सर्व फलक व होर्डिंग उभारण्याचे नियोजन करण्यात आले होते. या कामासाठी हायवे, एमएसआरडीसी आणि सार्वजनिक बांधकाम विभागाकडून नाहरकत प्रमाणपत्रे घेण्यात आले. शासकीय निधीच्या खर्चात पारदर्शकता राहावी यासाठी प्रत्यक्ष काम सुरू असतानाचे आणि काम पूर्ण झाल्यानंतरचे ‘जिओटॅग’ फोटो सादर करणे आवश्यक आहे.
कशा प्रकारच्या बॅनरवर किती खर्च
शुभेच्छा बॅनरः १५० नग (खर्चः ९७.५० लाख रुपये)
श्लोक बॅनरः ४३० नग (खर्च: ५१.६० लाख रुपये)
होर्डिंग बॅनर स्पेसः ६०,००० स्क्वेअर फूट (खर्चः ५१.०० लाख रुपये)
