काम बोलतंय! सचिन जगताप यांच्या कार्याला जिल्हा परिषदेची गौरवाची थाप

सोलापूर : जिल्हा परिषद समाज कल्याण विभागाच्या सभापती संस्कृती सातपुते तसेच जिल्हा परिषद सदस्यांच्या वतीने शिक्षणाधिकारी (माध्यमिक) तथा दिव्यांग समाज कल्याण अधिकारी सचिन नागनाथ जगताप यांचा त्यांच्या उल्लेखनीय व उत्कृष्ट प्रशासकीय कार्याबद्दल सन्मानपूर्वक सत्कार करण्यात आला. शिक्षण, दिव्यांग कल्याण आणि सामाजिक न्यायाच्या विविध योजनांची प्रभावी अंमलबजावणी, लाभार्थ्यांपर्यंत शासकीय योजनांचा पारदर्शक पद्धतीने लाभ पोहोचविणे तसेच प्रशासनात समन्वय साधून केलेल्या उल्लेखनीय कार्याची दखल घेत हा सत्कार करण्यात आला. यावेळी उपस्थित मान्यवरांनी सचिन जगताप यांच्या कार्यपद्धतीचे कौतुक करत त्यांच्या पुढील वाटचालीस शुभेच्छा दिल्या.

सभापती संस्कृती सातपुते यांनी यावेळी बोलताना, “शासकीय अधिकारी लोकाभिमुख दृष्टीकोन ठेवून प्रामाणिकपणे काम करत असतील तर त्यांचा गौरव होणे आवश्यक आहे. सचिन जगताप यांनी शिक्षण व दिव्यांग कल्याण क्षेत्रात केलेले कार्य प्रेरणादायी असून अशा अधिकाऱ्यांमुळे प्रशासनाविषयी नागरिकांचा विश्वास अधिक दृढ होतो,” असे सांगितले. सत्काराला उत्तर देताना सचिन नागनाथ जगताप यांनी हा सन्मान आपल्या संपूर्ण सहकाऱ्यांच्या सामूहिक प्रयत्नांचा असल्याचे सांगत, भविष्यातही शासनाच्या योजना अधिक प्रभावीपणे तळागाळातील लाभार्थ्यांपर्यंत पोहोचविण्यासाठी कटिबद्ध राहणार असल्याची भावना व्यक्त केली.

या सत्कार समारंभास जिल्हा परिषद सदस्य, समाज कल्याण विभागातील अधिकारी-कर्मचारी तसेच विविध क्षेत्रातील मान्यवर उपस्थित होते. कार्यक्रम उत्साहपूर्ण वातावरणात संपन्न झाला.