महापालिकेचा ड्रेसकोड ठरतोय यशस्वी; उर्वरित कर्मचाऱ्यांवर कारवाई अटळ

सोलापूर ; महापालिकेतील अधिकारी व कर्मचाऱ्यांमध्ये शिस्त, एकसमान कार्यसंस्कृती आणि प्रशासनाची सकारात्मक प्रतिमा निर्माण करण्यासाठी लागू करण्यात आलेल्या ड्रेसकोडला प्रतिसाद मिळत आहे. सध्या सुमारे ७० टक्के अधिकारी व कर्मचारी नव्या गणवेशात नियमितपणे कार्यालयात उपस्थित राहत आहेत. या नियमाची शंभर टक्के अंमलबजावणी होण्यासाठी दंडात्मक कारवाई तीव्र करण्यात येणार असल्याचे महापालिका आयुक्त सचिन ओम्बासे यांनी सांगितले.

महापौर विनायक कोंड्याल यांच्या निर्देशानुसार महापालिकेतील वर्ग ‘ब’ ते ‘ड’मधील कायमस्वरूपी, मानधन आणि कंत्राटी अधिकारी कर्मचाऱ्यांसाठी ड्रेसकोड लागू करण्यात आला आहे. त्यानुसार पुरुष अधिकारी व कर्मचाऱ्यांसाठी निळ्या रंगाचा लाइनिंग शर्ट आणि गडद निळ्या (नेव्ही ब्ल्यू) रंगाची पँट, तर महिला अधिकारी व कर्मचाऱ्यांसाठी फिकट जांभळ्या रंगाची साडी किंवा त्याच रंगाचा पंजाबी ड्रेस निश्चित करण्यात आला आहे. आरोग्य विभाग,

घनकचरा व्यवस्थापन विभाग आणि अग्निशमन दलातील कर्मचाऱ्यांसाठी यापूर्वीचा अधिकृत गणवेशच कायम ठेवण्यात आला आहे. ड्रेसकोडचे पालन न करणाऱ्या अधिकारी अथवा कर्मचाऱ्यांकडून प्रतिदिन १०० रुपयांचा दंड वसूल करण्याचे अधिकार संबंधित विभागप्रमुखांना देण्यात आले आहेत. महापालिका प्रशासनाने ड्रेसकोडची प्रभावी अंमलबजावणी करण्यासाठी कठोर भूमिका घेतली असून, नियमाचे उल्लंघन करणाऱ्या कर्मचाऱ्यांवर दंडात्मक कारवाई केली जाणार असल्याचेही आयुक्तांनी स्पष्ट केले.