सोलापूर, : बालविवाह प्रतिबंधक अधिनियम, पॉक्सो कायदा आणि भारतीय दंड संहितेअंतर्गत दाखल करण्यात आलेल्या गुन्ह्यातील आरोपी सविता सुरेश चव्हाण (वय ५५, रा. शिवाजीनगर तांडा, केगाव, जि. सोलापूर) यांना मुंबई उच्च न्यायालयाच्या कोल्हापूर खंडपीठाने सशर्त अटकपूर्व जामीन मंजूर केला आहे. न्यायमूर्ती मेहरोज के. पठाण यांनी जामीन अर्ज क्रमांक २३१०/२०२५ मध्ये हा आदेश दिला. फौजदार चावडी पोलीस ठाण्यात ११ फेब्रुवारी २०२५ रोजी गुन्हा क्रमांक ६९/२०२५ दाखल करण्यात आला होता. या प्रकरणात सुरेश शोभराज चव्हाण, किरण सुरेश चव्हाण, नितीन सुरेश चव्हाण, सविता सुरेश चव्हाण आणि कविता हरिश्चंद्र चव्हाण यांच्याविरुद्ध भारतीय दंड संहिता, पॉक्सो कायदा आणि बालविवाह प्रतिबंधक अधिनियमातील विविध कलमान्वये गुन्हा नोंद करण्यात आला होता.
फिर्यादीने दिलेल्या तक्रारीनुसार, मोठ्या बहिणीने सासरचे घर सोडल्यानंतर तिच्यावर बहिणीच्या पतीसोबत विवाह करण्यासाठी दबाव टाकण्यात आला. धमकी, मारहाण आणि दबावाखाली अल्पवयीन अवस्थेत विवाह लावून देण्यात आल्याचा तसेच त्यानंतर छळ करण्यात आल्याचा आरोप तक्रारीत करण्यात आला होता.
अटकपूर्व जामीन अर्जाच्या सुनावणीदरम्यान बचाव पक्षाने सविता चव्हाण यांना विनाकारण गुन्ह्यात गोवण्यात आल्याचा दावा केला. त्या फिर्यादीच्या सासू असून कथित घटनेत त्यांचा कोणताही प्रत्यक्ष सहभाग नसल्याचे न्यायालयास सांगण्यात आले. या प्रकरणातील सहआरोपी नितीन चव्हाण व किरण चव्हाण यांना यापूर्वी नियमित जामीन मिळाला असून कविता चव्हाण यांनाही अंतरिम संरक्षण देण्यात आले असल्याचे बचाव पक्षाने निदर्शनास आणून दिले.
तसेच अर्जदार वयोवृद्ध महिला असून त्यांच्याविरुद्ध कोणताही गुन्हेगारी पूर्वइतिहास नसल्याचे सांगण्यात आले. फिर्याद कथित घटनेनंतर सुमारे नऊ महिन्यांनी दाखल झाल्याचा मुद्दाही न्यायालयासमोर मांडण्यात आला. न्यायालयाने घालून दिलेल्या सर्व अटींचे पालन करण्याची तयारी असल्याचे अर्जदारातर्फे स्पष्ट करण्यात आले. सरकार पक्षाने अटकपूर्व जामिनास विरोध केला. मात्र दोन्ही बाजूंचे युक्तिवाद ऐकल्यानंतर न्यायालयाने सविता सुरेश चव्हाण यांना सशर्त अटकपूर्व जामीन मंजूर केला.
या प्रकरणात आरोपीतर्फे ॲड. कदीर औटी, ॲड. सौरभ तांदळे, ॲड. प्रतिक जाधव, ॲड. वैभव बोंगे, ॲड. ओंकार फडतरे, ॲड. शिवरत्न वाघ, ॲड. मोहीम पठाण, ॲड. मनिष बाबरे, ॲड. रोहित थोरात, ॲड. संकेत पवार आणि ॲड. त्वरिता वाघ यांनी काम पाहिले. तर सरकार पक्षातर्फे ॲड. आनंद साळगावकर यांनी बाजू मांडली.
