‘लोकनाथ’ मीडिया चषक २०२६ ची ट्रॉफी अनावरण

पत्रकार मैदानावरही खेळाडू वृत्तीची दर्शन घडवतील : खा. धैर्यशील माने

सोलापूर | राजकारणात स्पर्धा असते, मात्र पत्रकार लेखणीबरोबरच क्रिकेटच्या मैदानावरही खेळाडूवृत्तीचे दर्शन घडवतील आणि ‘लोकनाथ’ मीडिया चषक २०२६ स्पर्धा यशस्वीपणे पार पडेल, असा विश्वास शिवसेनेचे संपर्कप्रमुख तथा खासदार धैर्यशील माने यांनी व्यक्त केला.राज्याचे उपमुख्यमंत्री एकनाथ शिंदे यांच्या वाढदिवसानिमित्त सेवालय फाउंडेशनचे अध्यक्ष मनिष काळजे यांच्या सहकार्याने १२, १३ व १४ जून रोजी रेल्वे मैदान येथे आयोजित ‘लोकनाथ’ मीडिया चषक २०२६ स्पर्धेच्या ट्रॉफीचे अनावरण शनिवारी सोलापूर श्रमिक पत्रकार संघाच्या सभागृहात करण्यात आले.

यावेळी राज्यसभेच्या खासदार प्रा. डॉ. ज्योती वाघमारे, शिवसेना जिल्हाप्रमुख अमोल शिंदे, सेवालय फाउंडेशनचे प्रमुख मनिष काळजे, ज्येष्ठ नेते साईनाथ अभंगराव, नगरसेवक प्रियदर्शन साठे, ज्ञानेश्वर सपाटे, सोलापूर श्रमिक पत्रकार संघाचे अध्यक्ष विक्रम खेलबुडे, खजिनदार किरण बनसोडे, डिजिटल मीडिया असोसिएशनचे विजयकुमार बाबर, उपाध्यक्ष अफताब शेख आदी उपस्थित होते.मनिष काळजे यांनी सांगितले की, उपमुख्यमंत्री एकनाथ शिंदे यांच्या वाढदिवसानिमित्त विविध सामाजिक, सांस्कृतिक, कला व क्रीडा उपक्रमांचे आयोजन करण्यात येत असून ‘लोकनाथ’ मीडिया चषक हा त्याचाच एक भाग आहे. पत्रकारांमध्ये स्नेह, एकोपा आणि क्रीडाभावना वृद्धिंगत व्हावी हा स्पर्धेचा उद्देश आहे.

या स्पर्धेत लोकमत, संचार, दिव्य मराठी, सकाळ, तरुण भारत संवाद, डिजिटल मीडिया, सोलापूर श्रमिक पत्रकार संघ, राज्य मराठी पत्रकार संघ आणि मेट्रो सोलापूर या संघांनी सहभाग नोंदविला आहे. कार्यक्रमाचे सूत्रसंचालन आप्पासाहेब पाटील यांनी केले.