सोलापूर. महापालिकेच्या मालकीच्या मिनी आणि मेजर गाळ्यांकडील थकीत भाडे, लँड फी तसेच अन्य देयकांच्या वसुलीला आता गती दिली जाणार आहे. कोणत्या गाळेधारकाकडे किती थकबाकी आहे, आतापर्यंत किती रक्कम वसूल झाली आणि किती वसुली प्रलंबित आहे, याची अद्ययावत माहिती तयार करून नियोजनबद्ध पद्धतीने वसुली मोहीम राबविण्याचे निर्देश महापौर विनायक कोंड्याल यांनी मालमत्ता विभागाला दिले.
महापालिकेच्या मालमत्ता विभागाच्या कामकाजासह शहरातील विविध भागांतील मिनी व मेजर गाळ्यांच्या वसुलीचा आढावा घेण्यासाठी गुरुवारी कौन्सिल हॉलमध्ये महापौर कोंड्याल यांच्या अध्यक्षतेखाली बैठक झाली. यावेळी गाळ्यांचे थकीत भाडे, लँड फी आणि इतर देयकांच्या सद्यस्थितीचा विभागनिहाय आढावा घेण्यात आला. शहरातील विविध भागांत महापालिकेच्या मालकीचे गाळे असून, त्यातून मिळणारा महसूल महापालिकेच्या उत्पन्नाचा महत्त्वाचा स्रोत आहे. त्यामुळे या मालमत्तांमधून मिळणाऱ्या उत्पन्नाची नियमित आणि वेळेत वसुली होणे आवश्यक असल्याचे बैठकीत स्पष्ट करण्यात आले. थकबाकी वाढत राहिल्यास त्याचा परिणाम महापालिकेच्या उत्पन्नावर होत असल्याने प्रलंबित वसुलीकडे विशेष लक्ष देण्याच्या सूचना देण्यात आल्या.
प्रत्येक गाळेधारकाची थकबाकी, केलेली वसुली आणि शिल्लक रक्कम यांची स्वतंत्र व अद्ययावत नोंद ठेवावी. दीर्घकाळापासून थकबाकी असलेल्या प्रकरणांचा प्राधान्याने आढावा घेऊन नियमानुसार आवश्यक कार्यवाही करावी. वसुलीची प्रक्रिया केवळ कागदोपत्री न ठेवता त्यासाठी प्रभावी नियोजन करून प्रलंबित प्रकरणे वेगाने निकाली काढावीत, असे निर्देश महापौरांनी दिले.महापालिकेच्या मालकीच्या मालमत्तांचे योग्य व्यवस्थापन करून त्यातून मिळणाऱ्या उत्पन्नात वाढ करण्यासाठी आवश्यक उपाययोजना राबविण्याबाबतही बैठकीत चर्चा झाली. मालमत्ता विभागाशी संबंधित विविध प्रलंबित बाबींचा विभागनिहाय आढावा घेऊन त्यावर कालबद्ध पद्धतीने कार्यवाही करण्याच्या सूचना अधिकाऱ्यांना देण्यात आल्या.
बैठकीस उपमहापौर ज्ञानेश्वरी देवकर, स्थायी समिती सभापती रंजिता चाकोते, सभागृहनेते नरेंद्र काळे, महापालिका आयुक्त डॉ. सचिन ओम्बासे, शहराध्यक्ष रोहिणी तडवळकर, माजी महापौर तथा नगरसेविका श्रीकांचना यन्नम, नगरसेवक गौतम कसबे, अतिरिक्त आयुक्त वीणा पवार, सहायक आयुक्त विनोद कुलकर्णी, कार्यालय अधीक्षक प्रशांत जाधव यांच्यासह संबंधित अधिकारी व कर्मचारी उपस्थित होते.
