महर्षी वाल्मिकी जयंतीनिमित्त उद्या सोलापुरात ५१ मूर्तींचे वाटप!

गणेश कोळी यांचा सामाजिक उपक्रम; २२ ऑक्टोबर रोजी इंद्रधनुष इस्टेट येथे आयोजन

सोलापूर : महर्षी वाल्मिकी जयंतीचे औचित्य साधून सामाजिक बांधिलकी जपत गणेश कोळी यांच्या वतीने सोलापुरात भव्य रक्तदान शिबिर आणि ५१ मूर्तींच्या वाटपाचे आयोजन करण्यात आले आहे. गुरुवार, दि. २२ ऑक्टोबर २०२६ रोजी सकाळी ११ वाजता विजापूर रोडवरील इंद्रधनु इस्टेट, सेफुल चौक येथे हा सामाजिक उपक्रम पार पडणार आहे.

महर्षी वाल्मिकी जयंती केवळ उत्सवापुरती मर्यादित न ठेवता समाजोपयोगी उपक्रमांच्या माध्यमातून साजरी करण्याचा प्रयत्न या आयोजनातून करण्यात आला आहे. रक्तदान हे श्रेष्ठ दान मानले जाते. गरजू रुग्णांना वेळेवर रक्त उपलब्ध व्हावे आणि रक्तदानाविषयी समाजात जनजागृती व्हावी, हा रक्तदान शिबिरामागील महत्त्वाचा उद्देश आहे. या उपक्रमांतर्गत ५१ मूर्तींचे वाटपही करण्यात येणार आहे. ज्या मंडळांनी मूर्तींसाठी आपली नावे नोंदवली आहेत, त्या मंडळांनी निर्धारित ठिकाणी उपस्थित राहावे, असे आवाहन आयोजकांकडून करण्यात आले आहे.

रक्तदानातून गरजू रुग्णांना जीवनदान देण्याची संधी आणि मूर्तीवाटपातून धार्मिक-सांस्कृतिक परंपरेला प्रोत्साहन, अशा दुहेरी उद्देशाने हा उपक्रम आयोजित करण्यात आला आहे. महर्षी वाल्मिकी यांच्या जयंतीनिमित्त सामाजिक एकोपा, सेवाभाव आणि मानवतेचा संदेश देणाऱ्या या उपक्रमाला नागरिकांनी उत्स्फूर्त प्रतिसाद द्यावा, असे आवाहन आयोजक गणेश कोळी यांनी केले आहे.