सोलापूर :बिकानेर एक्सप्रेसमध्ये प्रवासी महिलेचे तब्बल 9 लाख रुपयांचे दागिने लंपास करून फरार झालेल्या झारखंडच्या आंतरराज्यीय सराईत चोरट्याला सोलापूर लोहमार्ग पोलिसांनी अवघ्या 3 तासांत अटक करून मोठी कामगिरी बजावली आहे. आधुनिक तंत्रज्ञानासोबतच पारंपरिक पोलिसी कौशल्याचा वापर करत पोलिसांनी ही कारवाई केली.
अटक करण्यात आलेल्या आरोपीचे नाव सुनावली राजनकुमार श्री सिद्धेश्वर कुमार श्रीवास्तव, वय 57 वर्षे, रा. रांची, झारखंड असे आहे. त्याच्यावर यापूर्वीही अनेक राज्यांमध्ये चोरीचे गुन्हे दाखल असल्याची माहिती पोलिसांनी दिली. बिकानेर रेल्वेगाडीत प्रवास करणाऱ्या एका महिलेचे 9 लाख रुपये किमतीचे दागिने चोरीला गेले होते. गुन्हा घडताच लोहमार्ग पोलिसांनी तातडीने तपास सुरू केला. सीसीटीव्ही फुटेज आणि आरोपीच्या मोबाइल लोकेशनच्या आधारे अवघ्या तीन तासांत त्याचा माग काढण्यात आला. चोरी केल्यानंतर आरोपी पहाटेच गाणगापूरला देवदर्शनासाठी गेला होता. त्यानंतर तो पुन्हा सोलापुरात आला. येथून राजकोट एक्सप्रेसने मुंबईला पळून जाण्याच्या तयारीत तो होता. पोलिस तपासात समोर आले की, आरोपी 21 तारखेला सोलापुरात आला होता. तो एका लॉजमध्ये खोटे नाव सांगून राहिला होता. मात्र, लॉजच्या नोंदवहीत दिलेला मोबाइल क्रमांक खरा होता. याच क्रमांकाच्या लोकेशनवरून पोलिसांनी त्याचा माग काढला.
गांधी चौकात सिनेस्टाइल पाठलाग, अटक करून आरोपींना ताकद घेण्यात आले आहे लोहमार्ग पोलिस ठाण्याचे प्रभारी अधिकारी महेश भावीकट्टी यांच्या मार्गदर्शनाखाली उपनिरीक्षक शब्बीर तांबोळी, हवालदार प्रकाश जिराळ, सूरज वायदंडें , कोळी आणि संदीप राठोड यांच्या गुन्हे शोध पथकाने आरपीएफच्या मदतीने सोलापूर रेल्वे स्टेशनजवळील गांधी चौकात सापळा रचला. आरोपी येताच पोलिसांनी झडप घालून त्याला ताब्यात घेतले.
आरोपीकडून 4 सोन्याच्या बांगड्या, लेडीज पर्स आणि मोबाइल चार्जर असा एकूण 9 लाख 5 हजार रुपये किमतीचा मुद्देमाल जप्त करण्यात आला आहे. न्यायालयाने आरोपीला चार दिवसांची पोलिस कोठडी सुनावली असून पुढील तपास सुरू आहे. केवळ 3 तासांत आंतरराज्यीय गुन्हेगाराला जेरबंद केल्याने सोलापूर लोहमार्ग पोलिसांचे सर्व स्तरातून कौतुक होत आहे. सीसीटीव्ही, मोबाइल ट्रॅकिंग आणि मानवी बुद्धिमत्तेचा सुरेख समन्वय या कारवाईत दिसून आला.
