सोलापूर : आजच्या स्पर्धात्मक युगात यशस्वी होण्यासाठी केवळ शैक्षणिक पदवी पुरेशी नसून वैचारिक प्रगतीसाठी दर्जेदार पुस्तकांचे वाचन आवश्यक आहे. प्रत्येक यशस्वी व्यक्तीच्या पाठीमागे वाचलेली पुस्तके असतात. त्यामुळे तरुणांनी मोबाईलच्या विश्वातून बाहेर पडून पुस्तकांशी मैत्री करावी, असे प्रतिपादन प्रसिद्ध उद्योजक व व्यवसाय सल्लागार विकास कोळी यांनी केले.इंद्रधनु गणेशोत्सव मंडळाच्या वतीने आयोजित व्याख्यानमालेत ‘यशस्वी आयुष्य घडवणारी पुस्तके’ या विषयावर ते बोलत होते. यावेळी त्यांनी वाचनाचे महत्त्व, व्यक्तिमत्त्व विकास आणि यशस्वी जीवनासाठी पुस्तकांची भूमिका याबाबत मार्गदर्शन केले.
कोळी म्हणाले की, लहानपणी वाचलेली पुस्तके ही केवळ बालकथा नसतात, तर माणसाचा स्वभाव घडवण्याचे आणि स्वतःची क्षमता व मर्यादा समजून घेण्याचे प्रभावी साधन असतात. नोकरी किंवा स्वयंरोजगाराच्या चौकटीत न अडकता तरुणांनी व्यवसाय, उद्योग आणि नव्या संधींचा शोध घ्यायला हवा. त्यासाठी व्यापक वाचन आणि सातत्याने नवे शिकण्याची वृत्ती आवश्यक आहे.‘लहानपणी वाचनाला लागलेली गोडी आज उद्योग उभा करण्यासाठी मार्गदर्शक ठरली,’ असे सांगत त्यांनी स्वतःच्या वाचनप्रवासातील अनुभवही उपस्थितांसमोर मांडले. यावेळी त्यांनी पुस्तकांमधून मिळणारे विचार, अनुभव आणि ज्ञान हे आयुष्याला नवी दिशा देऊ शकते, असे स्पष्ट केले.आजच्या पिढीने केवळ शिक्षण आणि नोकरीपुरते मर्यादित न राहता वाचन, विचार आणि कृती यांचा संगम साधला तर स्वतःच्या आयुष्याला वेगळी दिशा देता येईल, असा संदेश या व्याख्यानातून त्यांनी दिला.
