दिल्ली, दि. ७ : आझाद मैदानावरील शिक्षक आंदोलनादरम्यान राज्य शासनाने दिलेल्या आश्वासनांची लवकर अंमलबजावणी व्हावी, यासाठी पुणे विभाग शिक्षक मतदारसंघाचे इच्छुक उमेदवार मंगेश चिवटे यांनी दिल्लीत प्रशासकीय स्तरावर महत्त्वपूर्ण पाठपुरावा केला. महाराष्ट्र विधानपरिषदेचे उपसभापती सचिन अहिर यांची भेट घेऊन त्यांनी शिक्षकांच्या विविध प्रलंबित मागण्यांचे निवेदन सादर केले.
आझाद मैदानावरील आंदोलनानंतर शिक्षक प्रतिनिधींशी चर्चा करून शासनाने त्यांच्या मागण्यांवर स्वतंत्र बैठक घेण्याचे आश्वासन दिले होते. त्यानुसार संबंधित बैठक लवकर आयोजित करून निर्णय प्रक्रियेला गती मिळावी, यासाठी चिवटे यांनी उपसभापतींकडे पाठपुरावा केला.या निवेदनाची दखल घेत उपसभापती सचिन अहिर यांनी शिक्षणमंत्री दादाजी भुसे यांच्या दालनात संबंधित अधिकाऱ्यांसमवेत बैठक आयोजित करण्याबाबत सकारात्मक नोंद केली आहे. त्यामुळे शिक्षकांच्या मागण्यांवर शासन स्तरावर लवकरच चर्चा होण्याची शक्यता निर्माण झाली आहे.शिक्षकांच्या प्रश्नांकडे केवळ आंदोलनाच्या दृष्टीने न पाहता त्यांच्या न्याय्य मागण्यांवर तोडगा काढण्यासाठी शासन आणि शिक्षक संघटनांमध्ये समन्वय होणे आवश्यक असल्याचे मंगेश चिवटे यांनी यावेळी सांगितले.
शासनाने दिलेले आश्वासन प्रत्यक्षात पूर्ण होईपर्यंत पाठपुरावा सुरू ठेवण्याचा निर्धारही त्यांनी व्यक्त केला.आझाद मैदानातील आंदोलनावेळी शिक्षकांनी दाखविलेल्या विश्वासाबद्दल कृतज्ञता व्यक्त करताना चिवटे म्हणाले, “राज्यातील शिक्षकांच्या प्रलंबित प्रश्नांवर सकारात्मक निर्णय व्हावा आणि त्यांना वेळेत न्याय मिळावा, यासाठी सातत्याने प्रयत्न सुरू राहतील.”दरम्यान, शिक्षणमंत्री दादाजी भुसे यांच्या दालनात प्रस्तावित बैठकीकडे राज्यभरातील शिक्षकांचे लक्ष लागले असून, या बैठकीत प्रलंबित मागण्यांबाबत ठोस निर्णय होण्याची अपेक्षा व्यक्त केली जात आहे.
