अखेर न्याय मिळाला! जुनी मिल कामगार वारसदारांच्या नावे ३० कोटींची जागा

सोलापूर | सोलापूर शहराच्या मध्यवर्ती भागातील हर्समस लाईन परिसरातील जुनी मिल कामगार वारसदारांच्या मालकीची सुमारे ३० कोटी रुपये किमतीची जागा वारसदारांच्या नावे हस्तांतरित करण्याचा मार्ग अखेर मोकळा झाला आहे. या निर्णयामुळे अनेक वर्षांपासून प्रलंबित असलेला प्रश्न निकाली निघाला असून हजारो माजी मिल कामगारांच्या वारसदारांना मोठा दिलासा मिळाला आहे. या महत्त्वपूर्ण निर्णयासाठी माजी आमदार तथा शिवसेना जिल्हाध्यक्ष विजय मोरे आणि सचिव मधुकर कुलकर्णी यांनी सातत्याने पाठपुरावा केला होता. त्यांच्यासह संबंधित कामगार प्रतिनिधींनी शासन आणि प्रशासनाकडे वेळोवेळी मागणी लावून धरत हा प्रश्न मार्गी लावण्यासाठी प्रयत्न केले.

सन १९६३ मध्ये जुनी मिल बंद झाल्यानंतर हजारो कामगारांवर उपासमारीची वेळ आली होती. त्यानंतर अनेक वर्षे ही जागा हस्तांतरित करण्याचा प्रश्न रखडला होता. दरम्यान, माजी आमदार कुमार कर्णिक यांनी दिनांक २३ मे २०२५ रोजी जनहित याचिका दाखल करून न्यायालयीन लढा उभारला. न्यायालयाने संस्थेच्या नावे असलेल्या सुमारे २९ ते ३० कोटी रुपयांच्या जागेच्या हस्तांतरणाबाबत सकारात्मक भूमिका घेतल्याने प्रक्रिया गतीमान झाली.

जागा हस्तांतरणासाठी आवश्यक असलेली सर्व कायदेशीर प्रक्रिया पूर्ण करण्यात आली असून नागरिकांकडून दाखल करण्यात आलेले हरकतीचे अर्जही फेटाळण्यात आले आहेत. त्यामुळे संबंधित वारसदारांना त्यांच्या हक्काची जागा मिळण्याचा मार्ग आता पूर्णपणे मोकळा झाला आहे. या प्रकरणात अॅड. परशुराम सिद्धम ढबळे, रजनीकांत होनराव, पंडित माने, अमोल पवार आणि अजय मरक आदींनीही महत्त्वपूर्ण भूमिका बजावल्याचे सांगण्यात आले आहे. कामगारांच्या वारसदारांसाठी हा निर्णय ऐतिहासिक ठरणार असून अनेक वर्षांचा न्यायाचा लढा अखेर यशस्वी ठरल्याची भावना व्यक्त होत आहे