सोलापूर : पर्यावरण संवर्धनाचा संदेश देत आणि आधुनिक, प्रदूषणमुक्त सोलापूरच्या दिशेने पाऊल टाकत सोलापूरचे महापौर विनायक कोंड्याल आणि उपमहापौर ज्ञानेश्वरी देवकर यांनी आज ई-बाईकवरून महापालिका कार्यालयात आगमन केले. त्यांच्या या उपक्रमाची शहरभर चर्चा रंगली असून नागरिकांकडूनही त्याचे स्वागत करण्यात येत आहे.वाढते प्रदूषण, इंधन दरवाढ आणि पर्यावरणाचा समतोल राखण्याच्या पार्श्वभूमीवर इलेक्ट्रिक वाहनांचा वापर वाढविण्याची गरज महापौरांनी यावेळी अधोरेखित केली.
“पर्यावरणपूरक जीवनशैली स्वीकारणे ही काळाची गरज आहे. प्रत्येक नागरिकाने शक्य तितका पर्यावरणस्नेही पर्याय स्वीकारल्यास शहर अधिक स्वच्छ आणि प्रदूषणमुक्त होईल,” असे मत त्यांनी व्यक्त केले.महापौरांच्या या कृतीमुळे शहरातील युवक आणि नागरिकांमध्ये पर्यावरणाविषयी सकारात्मक संदेश गेला असून ‘ग्रीन सोलापूर’च्या संकल्पनेला बळ मिळाल्याची भावना व्यक्त होत आहे. महापालिकेतील अधिकारी, कर्मचारी आणि नागरिकांनीही या उपक्रमाचे कौतुक केले.
