सोलापूर: गेल्या सहा महिन्यांपासून रखडलेल्या होटगी रोडवरील आसरा रेल्वे ओव्हरब्रिजच्या (ROB) कामाला अखेर वेग मिळणार आहे. या संदर्भात आमदार सुभाष देशमुख यांनी पुढाकार घेऊन रेल्वे प्रशासन आणि संबंधित कंत्राटदारांची तातडीची बैठक बोलावली होती. या बैठकीत “येत्या पावसाळ्यापूर्वी कोणत्याही परिस्थितीत ब्रिजचे काम पूर्ण होऊन तो जनतेसाठी खुला झाला पाहिजे,” असे स्पष्ट आणि कडक निर्देश आमदार देशमुख यांनी दिले आहेत.महत्त्वाची बैठक आणि उपस्थितीआमदार सुभाष देशमुख यांच्या जनसंपर्क कार्यालयात ही महत्त्वाची बैठक पार पडली.
या बैठकीला मध्य रेल्वे विभागाचे वरिष्ठ अधिकारी भूषण गिरी, प्रकल्पाचे कंत्राटदार रोहन पाटील यांच्यासह सोलापूर महापालिकेचे नगरसेवक दीपक जमादार , मधुसूदन जंगम, वनिता पाटील सत्यजित वाघमोडे आणि इतर पदाधिकारी उपस्थित होते.
होटगी रोड हा सोलापूर शहरातील अत्यंत वर्दळीचा रस्ता आहे. आसरा ब्रिजचे काम रखडल्यामुळे गेल्या सहा महिन्यांपासून या भागातील वाहतुकीचा मोठा खोळंबा होत आहे. नागरिकांना लांबच्या अंतराने वळसा घालून जावे लागत असून, यामुळे वेळेचा आणि इंधनाचा मोठा अपव्यय होत आहे. बैठकीदरम्यान आमदार देशमुख यांनी कामात होत असलेल्या विलंबाबद्दल रेल्वे अधिकारी आणि कंत्राटदारांना जाब विचारला. तांत्रिक कारणांमुळे काम थांबले असेल, तर त्यावर तातडीने तोडगा काढून मनुष्यबळ वाढवण्याच्या सूचना त्यांनी दिल्या.
पावसाळ्याचे ‘डेडलाईन’ : पावसाळा सुरू झाल्यानंतर सिमेंट आणि डांबरीकरणाच्या कामात अडथळे येतात. जर पावसाळ्यापूर्वी हे काम पूर्ण झाले नाही, तर पुढील चार महिने नागरिकांना चिखल आणि वाहतूक कोंडीचा प्रचंड त्रास सहन करावा लागेल. ही बाब लक्षात घेऊन आमदार सुभाष देशमुख यांनी रेल्वे अधिकारी भूषण गिरी यांना कामाचा साप्ताहिक अहवाल सादर करण्यास सांगितले आहे. कंत्राटदार रोहन पाटील यांनीही आवश्यक साहित्य आणि यंत्रसामग्री वाढवून कामाला गती देण्याचे आश्वासन दिले आहे.
नागरिकांना दिलासा मिळणार : आसरा ब्रिज पूर्ण झाल्यामुळे होटगी रोड, विमानतळ परिसर आणि सैफुल भागातील नागरिकांचा प्रवास सुखकर होणार आहे. या बैठकीमुळे रखडलेल्या प्रकल्पाला नवसंजीवनी मिळाली असून, आता प्रत्यक्ष कामाला गती मिळते का, याकडे सोलापूरकरांचे लक्ष लागले आहे. नगरसेवक दीपक जमादार आणि मधुसूदन जंगम व सत्यजित वाघमोडे यांनीही या भागातील लोकांच्या तक्रारी मांडत लवकरात लवकर रस्ता मोकळा करण्याची मागणी केली.
