सोलापूर : शांती चौकातील स्मशानभूमीच्या जागेबाबत सुरू असलेल्या चर्चांवर अखेर श्री सिद्धेश्वर देवस्थानाचे अध्यक्ष धर्मराज काडादी यांनी खुलासा केला आहे. संबंधित जागा होटगी मठाला किंवा अन्य कोणास दिल्यास देवस्थानाची कोणतीही हरकत नसल्याचे त्यांनी स्पष्ट केले आहे.
काडादी यांनी दिलेल्या माहितीनुसार, श्री सिद्धेश्वर देवस्थानाने कधीही या स्मशानभूमीच्या जागेची मागणी महापालिकेकडे केलेली नाही. महापालिकेच्या निवडणुकीपूर्वी प्रशासनाच्या काळात, लिंगायत समाजासाठी व्यवस्थापनाचा अनुभव लक्षात घेऊन देवस्थानाला सहकार्याची अपेक्षा व्यक्त करण्यात आली होती. यासंदर्भात आमदार विजयकुमार देशमुख यांच्या नावाचा उल्लेख करत लेखी स्वरूपात देवस्थानाला विचारणा करण्यात आली होती.
या प्रस्तावावर देवस्थानाच्या बैठकीत चर्चा होऊन महापालिकेला होकारार्थी निर्णय कळवण्यात आला होता. त्यानंतर प्रशासनाच्या काळात संबंधित जागा देवस्थानाकडे देण्याची कार्यवाहीही सुरू झाली होती. मात्र निवडणुकीनंतर या विषयाकडे विशेष लक्ष दिले गेले नसल्याचे काडादी यांनी सांगितले.दरम्यान, निवडणुकीनंतर या प्रकरणावरून राजकारण सुरू असल्याचा आरोपही त्यांनी केला.
काही मंडळी जाणीवपूर्वक लिंगायत समाजात तसेच विविध संस्था आणि व्यक्तींमध्ये मतभेद निर्माण करण्याचा प्रयत्न करत असल्याचे त्यांनी नमूद केले.“सदर जागा होटगी मठाला अथवा इतर कोणालाही दिल्यास आमची हरकत नाही. हा निर्णय पूर्णपणे महानगरपालिकेच्या अधिकारात येतो,” असे काडादी यांनी स्पष्ट केले. श्री सिद्धेश्वर देवस्थान गेल्या 140 वर्षांपासून सोलापूरकरांसाठी धार्मिक, शैक्षणिक, वैद्यकीय व सामाजिक सेवा देत असल्याचेही त्यांनी स्पष्ट केले आहे.—
