सोलापूर: शहरातील विविध पोलीस ठाण्यांतर्गत गंभीर गुन्हे दाखल असलेले ३ सराईत गुन्हेगार इम्रान रफिक शेख(वय २३, रा. पाटील चाळ, मुरारजी पेठ, सोलापूर) ,राजू उर्फ राजेसिंग राम राठोड (वय २५, रा. शुक्रवार पेठ, माणिक चौक, सोलापूर) आणि अब्दुल वहाब नबीलाल शेख (वय ३७, रा. सोनिया नगर, विजापूर नाका, सोलापूर) याना सोलापूर शहर आणि जिल्ह्यातून दोन वर्षांसाठी तडीपार करण्यात आले आहे. इम्रान रफिक शेख याच्यावर २०१९ ते २०२५ या काळात बेकायदेशीर जमाव जमवून दंगल करणे, हाणामारी करणे, सामान्य नागरिकांवर दहशत निर्माण करणे, महिलांवरील अत्याचार आणि सरकारी कामात अडथळा निर्माण करणे यांसारखे गंभीर गुन्हे दाखल आहेत.
राजू उर्फ राजेसिंग राम राठोड याच्यावर २०२१ ते २०२४ दरम्यान नागरिकांना मारहाण करून दहशत माजवणे, जबरदस्तीने पैसे उकळणे आणि गंभीर दुखापत करणे असे गुन्हे दाखल आहेत. तसेच अब्दुल वहाब नबीलाल शेख याच्यावर मंगळसूत्र चोरी आणि मोबाईल चोरीचे एकूण ६ गुन्हे दाखल आहेत. त्यामुळे पोलीस उप-आयुक्त विजय कबाडे यांनी या तिघांना तडीपार केल्याचे आदेश नुकतेच काढले आहे. सोलापूर शहर आणि जिल्ह्यात वाढत्या गुन्हेगारीला लगाम घालण्यासाठी पोलीस प्रशासनाने कारवाई करण्यास सुरुवात केली आहे.
