सोलापूर: सन २०२५-२६ या आर्थिक वर्षाची सांगता ३१ मार्च रोजी झाली. या पार्श्वभूमीवर, शासकीय देयके निकाली काढण्यासाठी आणि शासनाचा महसूल जमा करण्याची प्रक्रिया विहित वेळेत पूर्ण करण्यासाठी सोलापूर जिल्हा कोषागार कार्यालय मंगळवारी रात्री १२ वाजेपर्यंत पूर्ण क्षमतेने कार्यरत होते, अशी माहिती जिल्हा कोषागार कार्यालयाचे अधीक्षक वैभव राऊत यांनी दिली आहे.
आर्थिक वर्षाच्या अखेरच्या दिवशी विविध शासकीय विभागांकडून मोठ्या प्रमाणात देयके (Bills) सादर केली जातात. ही सर्व देयके तपासून ती मंजूर करणे आणि निधीचे वितरण सुनिश्चित करणे हे कोषागार कार्यालयाचे महत्त्वाचे कर्तव्य असते. ३१ मार्चची मुदत संपण्यापूर्वी सर्व तांत्रिक प्रक्रिया पूर्ण व्हाव्यात, यासाठी अधीक्षक वैभव राऊत यांच्या मार्गदर्शनाखाली संपूर्ण कर्मचाऱ्यांनी अतिरिक्त वेळ देऊन कामकाज पूर्ण केले. मार्च अखेरच्या धावपळीत कोणत्याही विभागाचा निधी व्यपगत (Lapse) होऊ नये, यासाठी जिल्हा कोषागार कार्यालयाने विशेष नियोजन केले होते. रात्री उशिरापर्यंत कर्मचाऱ्यांनी देयकांची तपासणी करून ती निकाली काढली.
‘बीईएएमएस’ (BEAMS) आणि ‘कोषवाहिनी’ या प्रणालींद्वारे ऑनलाइन व्यवहार पूर्ण करताना तांत्रिक अडथळे येऊ नयेत, यासाठी विशेष पथक तैनात होते. केवळ देयकेच नव्हे, तर विविध करांच्या स्वरूपात येणारा महसूलही रात्री १२ वाजेपर्यंत स्वीकारण्याची व्यवस्था करण्यात आली होती. जिल्हाधिकारी कार्यालय आणि इतर महत्त्वाच्या विभागांशी समन्वय राखून प्रलंबित देयकांचे तात्काळ निराकरण करण्यात आले. अशी अधीक्षक वैभव राऊत यांनी सांगितले
“दरवर्षीप्रमाणे या वर्षीही मार्च अखेरचे कामकाज आव्हानात्मक होते. मात्र, कर्मचाऱ्यांच्या सहकार्यामुळे आम्ही रात्री उशिरापर्यंत बसून सर्व महत्त्वाची कामे पूर्ण केली. जिल्ह्यातील विकासकामांसाठीचा निधी वेळेत वितरित व्हावा, हाच आमचा मुख्य उद्देश होता.” या नियोजित कामकाजामुळे जिल्ह्यातील विविध विकास प्रकल्पांचा निधी वेळेत खर्च करण्यास मदत झाली असून, प्रशासकीय स्तरावर जिल्हा कोषागार कार्यालयाच्या या तत्परतेचे कौतुक होत आहे.
