सोलापूर : सोलापूर महानगरपालिकेच्या सुमारे ३० कोटी रुपयांच्या मुदतठेवी कोणत्या बँकेत ठेवायच्या, या प्रशासकीय निर्णयावरून भाजपमध्ये निर्माण झालेला अंतर्गत वाद आता उघडपणे समोर आला आहे. शहराध्यक्ष रोहिणी तडवळकर यांनी उपमहापौर ज्ञानेश्वरी देवकर यांच्या भूमिकेवर सार्वजनिक नाराजी व्यक्त केल्यानंतर आता भाजपचे ज्येष्ठ नेते वेडिंग यांनी उपमहापौरांच्या भूमिकेला पाठिंबा दर्शविल्याने पक्षातील दोन गट स्पष्टपणे समोर आल्याचे चित्र आहे.
महापालिकेच्या निधीवर अधिक व्याज मिळावे आणि आर्थिक लाभ व्हावा या उद्देशाने स्थायी समितीने ठेवी खासगी बँकेत ठेवण्याचा निर्णय घेतल्याची माहिती आहे. मात्र, सार्वजनिक निधीची सुरक्षितता आणि राष्ट्रीयीकृत बँकेवरील विश्वास लक्षात घेऊन या ठेवी स्टेट बँक ऑफ इंडिया (SBI) मध्येच ठेवाव्यात, अशी मागणी उपमहापौर ज्ञानेश्वरी देवकर यांनी थेट महापालिका आयुक्तांकडे लेखी निवेदनाद्वारे केली.या निर्णयावर शहराध्यक्ष रोहिणी तडवळकर यांनी तीव्र आक्षेप घेत, महापौर, सभागृह नेते आणि पक्ष संघटनेला विश्वासात न घेता थेट आयुक्तांना पत्र देणे योग्य नसल्याचे स्पष्ट केले.
पक्षातील समन्वय राखला गेला नाही, असे सांगत त्यांनी या प्रकरणाची माहिती पक्षश्रेष्ठींना देणार असल्याचेही जाहीर केले.दरम्यान, या वादात भाजपचे ज्येष्ठ नेते वेडिंग यांनी उपमहापौरांच्या भूमिकेचे समर्थन केले. महापालिकेचा निधी हा जनतेचा पैसा असून त्याच्या सुरक्षिततेला सर्वोच्च प्राधान्य असले पाहिजे, अशी भूमिका त्यांनी मांडल्याचे सांगितले जात आहे. त्यामुळे उपमहापौरांनी मांडलेला मुद्दा चुकीचा नसल्याचे त्यांनी स्पष्ट केले.या घडामोडींमुळे महापालिकेतील आर्थिक निर्णयापेक्षा भाजपमधील अंतर्गत समन्वय आणि नेतृत्वाच्या भूमिकेचीच अधिक चर्चा सुरू झाली आहे. महापालिकेच्या आर्थिक व्यवहारांवरून पक्षातील मतभेद उघडकीस आल्याने आगामी महासभा आणि स्थायी समितीच्या बैठकीत हा विषय आणखी तापण्याची शक्यता व्यक्त होत आहे. आता या वादावर पक्ष नेतृत्व काय भूमिका घेते आणि महापालिकेच्या ठेवींबाबत अंतिम निर्णय कोणता होतो, याकडे राजकीय वर्तुळाचे लक्ष लागले आहे.
