१४ बस, १०२ कामगार नेमके कुठे?; स्थायी समितीत चेतन नरोटे आक्रमक

सोलापूर : सोलापूर महानगरपालिकेच्या स्थायी समितीच्या सभेत आज शहरातील परिवहन व्यवस्थेचा मुद्दा चांगलाच गाजला. शहरात सध्या केवळ १४ बस सुरू असताना परिवहन विभागातील १०२ कामगार नेमके कुठे कार्यरत आहेत, असा थेट सवाल नगरसेवक चेतन नरोटे यांनी उपस्थित करत महापौरनां व प्रशासनाला धारेवर धरले.शहरातील बससेवा मर्यादित असतानाही मोठ्या संख्येने कर्मचारी कार्यरत असल्याचा दावा प्रशासनाकडून केला जात आहे.

मात्र, प्रत्यक्षात या कामगारांची नियुक्ती कुठे आहे, त्यांच्याकडून कोणती कामे करून घेतली जात आहेत आणि त्यांची उपस्थिती व कामकाजाची माहिती सभागृहासमोर सादर करावी, अशी मागणी नरोटे यांनी केली.या मुद्द्यावर त्यांनी आक्रमक भूमिका घेत परिवहन विभागाच्या कामकाजात पारदर्शकता नसल्याचा आरोप केला. शहरातील नागरिकांना सक्षम सार्वजनिक वाहतूक मिळत नसताना कर्मचारी व्यवस्थापनाचा योग्य ताळमेळ का ठेवला जात नाही, असा प्रश्नही त्यांनी उपस्थित केला.दरम्यान, या प्रश्नांवर प्रशासनाकडून सविस्तर माहिती देण्याचे आश्वासन देण्यात आले. मात्र, नरोटे यांनी कामगारांची संपूर्ण यादी, त्यांची नेमणूक आणि प्रत्यक्ष कामकाजाचा अहवाल सभागृहासमोर सादर करण्याची मागणी कायम ठेवली. त्यामुळे स्थायी समितीच्या बैठकीत हा विषय चर्चेचा केंद्रबिंदू ठरला.